روس آن پیٹرولیم مصنوعات آتا ہلنگ نا باندات مارچ اسکان طے مریک، وزیر مملکت پیٹرولیم مصدق ملک

اسلام آباد۔ 03 فروری (اے پی پی) وزیر مملکت پیٹرولیم ڈاکٹر مصدق ملک پارینے کہ روس آن پیٹرولیم مصنوعات آتا ہلنگ نا باندات مارچ اسکان طے مریک و اومیت ءِ کہ اپریل اٹی پیٹرولیم مصنوعات آتا فراوانی بناکیک۔ جمعہ نادے آ سینیٹ نا دیوان اٹی وقفہ سوج آتیٹی سینیٹر مشتاق احمد نا سوج انا ورندی ٹی او پارے کہ جنوری 2023 ء ٹی پیٹرولیم مصنوعات آتا واپار نا بابت پاکستانی و روسی ڈل آتا نیام اٹ بڑزکو کہولی اوڑدہی مس، روس اتون پاکستان نا خام تیل درآمد نا 20 درسد گرج آتے پورو ککننگ کن مریس معیاد کنٹریکٹ نا بابت مذاکرات برجاءِ، مارچ اسکان واپاری شڑت، خام تیل نا خصوصیت، مال برداری نا بست وبند و انشورنس تون اوار ایلو امور طے مریرہ، اومیت ءِ کہ اپریل اٹی پیٹرولیم مصنوعات آتا فراوانی بناکیک۔ اوپارے کہ روس ایلو ملک آتا بریبر پاکستان ءِ رعایت فراوان کیک، ایران و پاکستان نا نیام اٹ بارٹر سسٹم نا رداٹ واپار کننگک، ایران آ پابندی تا سوب آن گڑاس بشخ آتیٹی واپار کننگ مفک۔