کراچی۔ 02 فروری (اے پی پی) وزیراعظم محمد شہباز شریف پارینے کہ اڑزان توانائی پاکستان نا گرج ءِ، ڈیم تا تفنگ و گیگ بدل توانائی نا ڈٹ آتا پوروی آن بروک آ منہ سال اٹی پاکستان ءِ اڑزان توانائی نا دوئی کننگ آن ارب آ ڈالر نا بچت مریک، سی پیک نا ڈٹ مستین خڑک اٹی تینا ودی کروک مشکل آتا سوب آن تعطل نا گواچی مس، سی پیک ڈٹ و چینی کمپنی تتون شریداری ءِ ودفنہ ہراڑان ملک اٹی شونداری و شونہالی بریک۔ داخیال آتا درشانی ءِ او پنچ شنبےنادے آ کے۔ تھری ڈٹ انا بنائی دود آن تران کرسا کرے۔ وزیراعظم پارے کہ اوڑکن دا ڈٹ انا بناءِ کننگ شرفمندی نا ہیت اسے ، دا ڈٹ آن ملک اٹی توانائی نا گرج آتے پورو کننگ اٹ کمک رسینگک۔ اوپارے کہ پاکستان 27 بلین ڈالر نا پیٹرولیم مصنوعات درآمد کیک ہراننکن بھلا مالی مشکل آتا سوب ءُ، دا پلانٹ آن اڑزان توانائی دوئی مریک ہرا پاکستان نا بھلا گرج ءِ۔ وزیراعظم پارے کہ اللہ تعالیٰ پاکستان ءِ ہندن ءُ وسیلہ تسنے کہ نن ہائیڈل و ایلو ذریعہ غاتے اٹ اڑزان بجلی ودی کننگ کینہ ولے نن کچ آن بھاز کم بجلی ودی کننگ اُن۔ وزیراعظم پارے کہ دیامربھاشا و داسوڈیم زیر تعمیر ءُ، اوفتا آپریشنل مننگ اٹ پین 4، 5 سال لگک، پاکستان دے و تہوآن اڑزان بجلی دوئی کننگ کیک، بروک آ سال تیٹی گیگ بدل توانائی تا ڈٹ آتیان اڑزان بجلی دوئی مریک۔ اوپارے کہ تھر اٹی اللہ تعالیٰ ننے بے پناہ قدرتی وسیلہ تسنے ہرا ننا بروک آ کیہی سد سال آتا گرج آتے پورو کننگ کن گنج اسے ءُ و ملک انا شونداری وشونہالی ٹی اہم ءُ کڑد اس ادا کننگ کیرہ، حکومت گیگ بدل توانائی نا ڈٹ آتیا کاریم ءِ مون آ دیک تانکہ پیٹرولیم مصنوعات نا مد خڑچ مروک آ ارب آ ڈالر آتے بچفنگ مرے۔ وزیراعظم پارے کہ کے۔ تھری ڈٹ آتے نواز شریف دور اٹی گڈیکو دروشم اس تننگا، اینو دا 1100 میگاواٹ بجلی ودی کننگ ءِ، داڑا پین کاریم کننگ نا گرج ءِ ، دا چرجوئی ٹی چینی سنگت آتون گپ وتران مننگ ءِ۔ اوپارے کہ پاکستان اٹی ساڑی آ نوکاپ آن بھلو کچ اسے آ بھسکاری مس و 30 ارب ڈالر نا زرگزرانی نسخان مس، داحالیت آتیٹی نن چینی سنگت آتیان اومیت تخنہ کہ او فی یونٹ نہاد اٹی کمتی کیرہ۔ وزیراعظم پارے کہ چشمہ۔ فائیو نا معاہدہ ہم زوت مریک، پاکستان وچین جوان ءُ سنگت و ایلم ءُ، تدوک آ 75 سال اٹی ننا سنگتی وخت انا ہر آزمائشت آ پورو سلیسنے و ہروڑنا حالیت آتیٹی چین پاکستان تون تفینے۔ اوپارے کہ 2015 ٹی نواز شریف نا کماشی ٹی سی پیک نا رداٹ ارب آ ڈالر نا ڈٹ آتیا دستخط مس ہرانا رداٹ اینو ہزار آ میگاواٹ بجلی ودی مننگ ءِ۔ ملک اٹی سی پیک نا رداٹ ایلو کیہی ڈٹ آک ہم برجاءُ۔ وزیراعظم پارے کہ پاک چین سنگتی داسہ بروک آ ریسہ غاتیٹی پترینگک۔ مستین خڑک اٹی سی پیک تینا ودی کروک مشکل آتا سوب آن تعطل نا گواچی مس۔ انڈسٹریل زون جوڑ مروئی ئسک ہراجوڑ مننگ کتو۔ داسہ ننا پبی کوشست ءِ کہ دا ڈٹ آتے مون آ دین۔ پشاور آ ن کراچی ریلوائی نا ایم ایل ۔ ون ڈٹ آن انقلاب بریک ۔ وزیراعظم پاکستان اٹامک انرجی کمیشن نا کمامدار، سائنس دان ، انجینئر و اسٹاف ءِ ڈٹ آ دے ونن خواری کننگ آ شاباشی تس و پارے کہ او پبی ستانا حقدار ءُ۔ وزیراعظم چین اتون شریداری ءِ اہم گوندسا پارے کہ پین ڈٹ آتا بنا و پوروی کن چینی کمپنی تتون معاہدہ کننگک۔ اوڈٹ آ کاریم کروک آ چینی کمپنی تا عہدیدار،انجینئر و اسٹاف نا ہم منت واری ءِ ہرفے و سلہ خلک کہ اواری اٹ پین ڈٹ آتیکن پیش رفت کننگے۔ اوکان پد وزیراعظم کے۔ تھری آپریشن روم انا دورہ ءِ کرے ہراڑے اودے ڈٹ انا بابت حوال تننگا۔
