اسلام آباد۔ 02 فروری (اے پی پی) وزیر مملکت خارجہ امور حنا ربانی کھر (اینو) جمعہ غان سری لنکا نا دارالحکومت کولمبو نا 2 دے ئی دورہ ءِ کیک۔ دفترخارجہ نا ترجمان نا رداٹ وزیرمملکت خارجہ امور سری لنکا نا 75 می یوم آجوئی ٹی بطور مہمان خاص بشخ ہلیک، یوم آجوئی نا دود آتیٹی بشخ ہلنگ آن بیدس او تینا ہم منصب تون اوار سری لنکا نا سرکڑدہ غاتون اوڑدہی کیک۔ ترجمان پارے کہ پاکستان و سری لنکا نا نیام اٹ تاریخی تعلقداری ءِ ہرا ہڑتوم آ کنڈآتا کمکاری نا غٹ پلو آتیٹی پدریسہ مون آ ہِننگ ءُ۔ اوپارے کہ ہڑتوم آ ملک آک سارک اتون اوار کثیر الجہتی فورم آتیٹی ہم اواری اٹ کاریم کرینو، وزیر مملکت حنا ربانی کھر نا دورہ سری لنکا ہڑتوم آ ملک آتا نیام اٹ افہام و تفہیم ءِ ودفنگ اٹ کمکار مریک و مشکل وخت اٹی سری لنکا کن پاکستان نا مخ تفی نا کلہو ءِ ایتک۔
