اسلام آباد۔ 02 فروری (اے پی پی) پاکستان پارینے کہ 5 فروری آ یوم یکجہتی کشمیر ءِ اسہ وار ولدا پبی وڑاٹ اڈتننگک، ہرسال آنبار دا سال آ ہم پاکستانی قوم یوم یکجہتی کشمیر نا وخت آ تینا کشمیری ایلم و ایڑھ تا حق خودارادیت نا دوئی کننگ کن اوفتا انصاف اٹ جہد اٹی اوفتے تون بدل مفروک یکجہتی نا درشانی ءِ کیرہ۔ دفترخارجہ نا ترجمان ممتاز زہرا بلوچ پنچ شنبے نادے آداڑے پریس حوال اٹی پارے کہ پاکستان اٹی راج انا غٹ تپہ و مچ آ دنیا ٹی رہینگوک آ پاکستانی و کشمیریک دادے ءِ روایتی جوش و جوزہ اٹ اڈ ایترہ۔ ترجمان پارے کہ نن سمجھنہ کہ ڈیہہ ٹی پائیدار امن و سلامتی و شونداری نا سیبو جموں وکشمیر نا جھیڑہ نا پرامن ایسری آٹی ءِ۔ اوپارے کہ داالمی ءِ کہ کشمیری الس اقوام متحدہ نا کنڈآن آجو و بے کنڈ ہلوک استصواب رائے نا کمک اٹ تینا حق خودارادیت ءِ کاریم اٹ اتیر۔ او داہیت آ زور شاغسا پارے کہ پاکستان اقوام متحدہ نا سلامتی کونسل نا قرارداد آتا رداٹ جموں و کشمیر نا جھیڑہ نا انصاف اٹ و پرامن ایسری کن تینا کشمیری ایلم و ایڑھ تا ہر ممکن مخ تفی ءِ برجاتخک۔
