اسلام آباد۔ 02 فروری (اے پی پی) پاکستان پارینے کہ او فلسطینی الس نا حق خودارادیت تون اوار اوفتا حق انا پورو دوئی کننگ کن اوفتا روا و انصاف اٹ جہد نا پبی و بدل مفروک مخ تفی ءِ برجاتخک۔ دفترخارجہ نا ترجمان ممتاز زہرا بلوچ پنچ شنبےنادے آ داڑے پریس حوال اٹی پارے کہ پاکستان اقوام متحدہ و او آئی سی نا تعلقدار قراردادآتا رداٹ 1967 آن مست انا سیم و القدس الشریف ءِ فلسطین نا دارالحکومت جوڑ کننگ تون اوار اوار اسہ قابل عمل ، وتواجہ فلسطینی ریاست نا خواست نا مخ تفی ءِ کیک۔ ترجمان فلسطین نا چندی شار تیٹی کودک شاری تا شہیدی نا مذمت ءِ کرسا اسرائیلی کوزہ گیر فوج انا غیرکانودی دراندازی و ظالمانہ گام گیج آتے بند کننگ نا ہم خواست کرے۔ اوپارے کہ فلسطینی الس نا انسانی حق انا شرف ءِ کننگے۔ ترجمان پارے کہ پاکستان ڈنمارک اٹی قرآن پاک نا بے شرفی نا گندہ انگا و جارحانہ فعل انا سخت انگا لوز آتیٹی مذمت ءِ کرینے، نن تینا گڑتی ءِ ڈنمارک نا کمامدار آتسکان سرکرینن، نن داوڑنا کاررواءی تے نسل پرستی ، زینو فوبک و اسلاموفوبک تکنہ۔ ترجمان پارے کہ پاکستان ءِ مچ آ دنیا ٹی ودوک آ اسلاموفوبیا غا گڑتی ءِ انتئے کہ مذہبی خار تالان کننگ و مسلم اقلیت آتا برخلاف بیدادی آ ہشکا تننگ کن سلاہ درشانی نا آجوئی نا بے دریغ کاریم اٹ اتنگ انگ ءِ۔ اوجہانی برادری آ زور شاغا کہ او داوڑنا گام گیج آتیان پاکستان تون اوار مسلمان تے رسینگوک آ نسخان تا خیال ءِ تخے و داوڑنا خارتس و اسلاموفوبک کارروائی تے توننگ کن گچین گام گیج کے۔ ترجمان پارے کہ وزیر خارجہ بلاول بھٹو زرداری ماسکو نا ساڑی آ دورہ ٹی تینا روسی ہم منصب تون اوڑدہی کرے ہراٹی علاقائی و جہانی امور آ گپ وتران کننگا۔ ترجمان پارے کہ وزیر مملکت امور خارجہ حنا ربانی کھر جنیوا ٹی انسانی حق کانفرنس اٹی بشکخ ہلک و انسانی حق انا بابت حکومت پاکستان نا گام گیج آتیان معلومدار کرے۔ ترجمان دفترخارجہ پارے کہ پاکستان سوگو و پرامن اوغانستان نا خواہندار ءِ۔ اوپارے کہ پاکستان موسمیاتی بدلی تیان غٹ آن زیات زہمی ملک آتیٹی اوار ءِ و او موسمیاتی بدلی تا برخلاف اسیجائی کوشست آتا رداٹ کاریم کننگ خواہک۔
