اومیت ءِ پنچ سال آن کم وخت اٹی سود آن پاک نظام کن کاریم پورو مریک، وزیرخزانہ اسحاق ڈار نا قومی اسلامی اقتصادی فورم آن تران

اسلام آباد۔ 02 فروری (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ سود آن پاک بینکاری نظام و زرگزران نا ٹہیفنگ کن حکومت پبی کمک فراوان کننگ اٹی ءِ، غٹ شریدار آک اواری اٹ پورو کوشست کیرہ تو ہچ ءُ سوب اس اف کہ بنجائی شرعی عدالت نا تروک آ 5 سال انا نظام الاوقات آن مست سود آن پاک بینکاری و زرگزران ءِ استوار کننگ مریک، ملک انا بدبختی ءِ کہ 5 سال انا آزموندہ غاک ننے 24 می آن 47 می زرگزران جوڑ کرینو۔ اوداہیت ءِ پنچ شنبےنادے آ داڑے نیشنل اسلامک اکنامک فورم آن تینا تران اٹی پارے۔ وزیرخزانہ فورم نا اڈتننگ آ مفتی منیب الرحمان و اونا سنگت آتے است انا حب اٹ مبارکباد پیش کرے و پارے کہ پاکستان اٹی اسلامی نظام زرگزران نا لائحہ عمل اسہ ہندن ءُ سرحال اسے ہرااونا است آن خڑک ءِ و اونا است خواہی ءِ کہ زوت ہنین آ ملک اٹ سود انا خاتمہ مرے۔ وزیرخزانہ پارے کہ سود آن پاک زرگزران و بینکاری نا ٹہیفنگ نا نیک مسخت نا دوئی کننگ کن حکومت تون اوار غٹ ءِ تینا کڑد ادا کیر۔ اوپارے کہ 2013-17ٹی ہراتم او وزیر خزانہ ئسک تو او دا بابت گام گیج کریسس۔ ڈپٹی گورنر اسٹیٹ بینک سعید احمد ءِ دا چیلنج و زمواری ترفین ہرا تینا کاریم ءِ کرے و ای ہُننگ اٹی اُٹ کہ او اینو ہم تینا کاریم ءِ کننگ اٹی ءِ۔ اوپارے کہ داوخت آ حکومت اخس ترندی اٹ کاریم کننگ کریکہ او کاریم تے کرے۔ خراج نا ویل آتے ایسر کننگا، سیکورٹیز اینڈ ایکسچینج کمیشن نا بابت گام گیج کننگا، وزارت خزانہ ٹی بڑزکو آفیسر نا کماشی ٹی ونگ جوڑ کننگا۔ فنانس ایکٹ 2016 ٹی اسلامی بینکاری نا بابت شریعہ کمپلائنس بیلنس شیٹس تخوک آ کمپنی تے اِرا درسد نا رعایت تننگا۔ وزیرخزانہ پارے کہ دا کوشست آتا جوان ءُ بھرم اس دوئی مس، داوخت آ بیرہ اسہ میزان بینک اس ئسک ہرانا 100 برانچ ئسر، میزان بینک داسہ 1000 برانچ والا بینک جوڑ مسنے۔ اوپارے کہ کنا سٹڈی نا رداٹ فیصل بینک داکنڈا پیش گامی کرے ہراٹی اللہ برکت شاغا و اونا بیلنس شیٹ آ جوان ءُ اثر اس تما۔