اسلام آباد۔ 01 فروری (اے پی پی) وزیراعظم محمد شہباز شریف پارینے کہ دہشت گردی نا ناسور دُوارہ کاٹم ہرفنگ اٹی ءِ اونا توننگ کن دمدستی جوان گام گیج درکار ءِ، خیبرپختونخوا نا الس نا قربانی تے مدام یات تخنگک، خیبرپختونخوا ٹی 10 سال تحریک انصاف نا حکومت ئس ولے او خیبرپختونخوا نا الس ءِ دہشت گرد آتا رحم و کرم آ اِلا۔ چارشنبے نادے آ کابینہ دیوان اٹی پالیسی بیان ترسا وزیراعظم پارے کہ خیبرپختونخوا نا الس دہشت گردی نا برخلاف بے مٹ قربانی تسنے ہرافتے لوز آتیٹی بیان کننگ کپنہ، تاریخ مدام دا لمہ و اوفتا گلزادہ غاتے یات تخک، 2010 اٹی بنجا و صوبہ غاتا نیام اٹ وسیلہ غاتا بشخنگ آن مست کل وسیلہ غاتا اسہ درسد خیبرپختونخوا ءِ تننگا، دااینو اسکان تننگ انگ ءِ ہرا 417 ارب روپئی داتم اسکان جوڑ مریرہ، دا این ایف سی ایوارڈ آن بیدس صوبہ ءِ تننگانے، دااوفتا حق ئسک و ہرا جغرافیائی حالیت و اوفتا قربانیک ئسر تانکہ صوبہ ٹی دہشت گردی نا برخلاف فورس آتا کاریم نا کچ اٹی ودکی کننگ مرے و اوفتے پوسکن آ ازباب آتیان آراستہ کننگ مرے۔ وزیراعظم پارے کہ خدا چاہک دا بھلا زر ہراڑے خڑچ مس، 10 سال پی ٹی آئی نا حکومت ئس ، پین صوبہ اسے داوڑ ودکی زر ملتنے، اوفتا حساب ءِ ہلنگ ننا حق ءِ ، صوبہ خیبرپختونخوا ءِ 10 ارب روپئی سالانہ ملسا کرے، نن دوبہ خلنگ آخا بلکن راستکی تا بنداو آ ہیت کننگ اُن۔ اوپارے کہ غٹ صوبہ غاک این ایف سی ایوارڈ اٹی خوشدلی اٹ دا اسہ درسد ءِ خیبرپختونخواہ ءِ تننگ اٹ رضامندی ظاہر کریر ولے ہموڑے پولیس تون پوسکن آ سلہہ اف، ازباب اف، اوفتا تربیت متنے، کچ ودتنے، نیکٹا جوڑ مس، سی آئی ڈی جوڑ کننگا، داغٹ آن پد ہم دا پاننگ کہ صوبہ تون فنڈ الوکہ دا راستکی تے مسخ کننگ نا مترادف ءِ۔ اوپارے کہ خیبر پختونخوا نا سیاسی اُرا ہراٹی بلور خان تون اوار کیہی اہم شخصیت آک اوار ءُ، تینا جون تے ندر کریر، پاکستان نا مسکوہی وزیراعظم بے نطیر بھٹو قربانی تس، سول لائن مسیت اٹی پولیس آفیسر، اوفتا چناتے تون اوار کارندہ غاک شہید مسر۔ ننا ورناک ہراوڑ شجاعت و نرزوری نا مثال اس قائم کریسر دنیا ٹی اونا درور ملپک۔ اوپارے کہ اگہ نن دمدستی وڑاٹ جوان گام گیج کتون تو دا ناسور دُوارہ تالان مریک، نن داڑا ضرور اجتماعی بصیرت و کوشست آتے اٹ کنٹرول کینہ۔ اوپارے کہ سوج دا ودی مریک کہ دہشت گرد آتے پدی دیر ایس؟۔ مچ آ قوم خڑینکی ءِ و اَریفنگ ءِ کہ دُوارہ دہشت گردی انت اکن کاٹم ہرفے؟۔ دا حساسیت آن کابینہ نا باسک آک خبڑدار کرسا کریر، دا ننکن لمحہ فکریہ اسے داناجاست و پاست ءِ کروئی مریک، دا دِنا بیانیہ ئس کہ اودے مرکزی دنگ اٹ اتنگ آن دا ملک انا شونداری و شونہالی ٹی تینا کڑد ءِ ادا کیرہ، قوم دانا ورندی ءِ خواہنگ ءِ۔ اوپارے کہ کابینہ نا دیوان نا ایجنڈا ہندادے ، کابینہ نا باسک آک داڑا سجفر۔
