اسلام آباد۔ 01 فروری (اے پی پی) صدر مملکت ڈاکٹر عارف علوی ملک انا عالم دین و مشائخ آتیا زور شاغانے کہ او قرآن ، سنت و احادیث نبوی صلی اللہ علیہ و آلہ وسلم ءِ مون آتخسا اسلام نا حقی رغاموک آتے تالان کرسا انتہاپسندی، دہشت گردی و فرقہ واریت نا چٹفنگ کن تینا کڑد ءِ ادا کیر۔ صدر مملکت داخیال آتا درشانی ءِ علماء مشائخ یکجہتی کونسل آف پاکستان نا ڈل اتون گپ وتران کرسا کرے ہرا چارشنبےنادے آ داڑے ایوان صدر اٹی اوڑتون اوڑدہی کریر۔ ڈل انا کماشی ءِ علماء مشائخ یکجہتی کونسل آف پاکستان نا چیئرمین قاری ہدایت اللہ میرانی کریکہ۔ ڈل اٹی محمد یونس قریشی، مولانا گل ولی، میجر احتشام الدین کیانی، پروفیسر عبدالغفار شاہ بخاری ، عبدالرحیم عباسی، نورالٰہی ، فہد مقصود ، حمید اللہ خان ، شیخ مظہر حسین ، شیخ ضیاء الرحمان ، علامہ مفتی محمود احمد تبسم ، و جمال خان ئسک اوار ئسر۔ صدر مملکت ڈل اتون گپ وتران کرسا پارے کہ پاکستان اٹی دہشت گردی و عسکریت پسندی نا چیلنج آتیکن انسداد انتہاپسندی و انسداد دہشت گردی نا بشخ آتیٹی عالم دین تا کنڈان اسیجائی کوشست آتون اسہ جوان ءُ ایکشن پلان اسے نا گرج ءِ۔ صدر مملکت انتہاپسندی نا حوصلہ شکنی، رجای اصلاح ٹی کڑدادا کننگ کن عالم دین تیا زور شاغسا پارے کہ عالم دین و مشائخ مثبت راجی بدلی اتنگ کن تینا کڑد ءِ ادا کیر۔
