لاہور۔ 01 فروری (اے پی پی) پاکستان مسلم لیگ (ن) نا سینئر نائب صدر مریم نواز تون قائم مقام برطانوی ہائی کمشنر زوئی ویئر اوڑدہی کرے ہراٹی تین پہ تینی است خواہی نا امور آ گپ وتران کننگا۔ پارٹی ترجمان نا رداٹ اوڑدہی پارٹی نا مرکزی سیکرٹریٹ، 180 ایچ ماڈل ٹاؤن لاہور اٹی مس۔ برطانوی سفارت کار پارے کہ مشکل نا داساہت اٹی پاکستان نا حکومت و الس تون یکجہتی نا درشانی ءِ کینہ۔ قائم مقام ہائی کمشنر پشاور پولیس لائن مسیت اٹی دہشت گرد جلہو و نہادی انسانی جان تا زیان آ است ہسونی نا درشانی ءِ کرے۔ داوخت آ برطانوی سفارتکار تون گپ وتران کرسا مریم نواز پارے کہ پشاور واقعہ بھلو سانحہ اسے، ہر است غمزدہ ءِ، دہت گردی اسیجائی خطرہ ءِ، اسیجائی کوشست آتے اٹ دادے چٹفنگ مریک۔ مریم نواز پارے کہ پاکستان دہشت گردی نا برخلاف عظیم جانی و زرگزرانی نسخان ہرفینے، جمہوریت نا چرجوئی و وخت آ گچین کاری اہم ءِ ہراڑان مون تروک چیلنج آتا سرسہبی اٹ مقابلہ ممکن ءِ، دنیا ءِ پاکستان و اونا الس نا دامشکل حالیت آتیٹی کمک کروئی مریک، سیوتی حکومت بھسکار نوکاپ آن زہمی 3 کروڑ 30 لکھ مخلوق نا پبی کمک ءِ کرے، مشکل آ زرگزرانی حالیت آتیان پد ہم وزیراعظم شہباز شریف نوکاپ زہمی تے 100 ارب روپئی آن زیات مالی امداد فراوان کرے۔ مریم نواز برطانیہ و اونا ادارہ ڈیفیڈ نا کنڈان نوکاپ زہمی تا کمک آ منت واری ءِ ہرفے و پارے کہ پاکستان و برطانیہ نا نیام اٹ چندی بشخ آتیٹی ہڑتوم آ کنڈآتا رابطہ غاتے پین مون آ دننگ نا گرج ءِ، برطانیہ ٹی رہینگوک آ پاکستانی برادری ہڑتوم آ ملک آتا تعلقداری تا پین سوگوی ٹی اہم کڑد اس ادا کننگ ءُ۔ قائم مقام ہائی کمشنر پارٹی نا سینئر نائب صدر نا عہدہ غا تقرری آ مریم نواز ءِ مبارکبادی ہم تس و نیک است خواہی نا درشانی ءِ کرے۔ مریم نواز قائم مقام ہائی کمشنر نا بننگ و نیک است خواہی تا درشانی آ منت واری ءِ ہرفے۔
