اسلام آباد۔ 01 فروری (اے پی پی) چین پاکستان اقتصادی راہداری (سی پیک ) ڈٹ پاکستان نا راجی و اقتصادی شونداری ٹی اہم ءُ کڑد اس ادا کننگ ءِ، داوخت آ دا ملک انا بھاز بھلو میرات اس جوڑ مسنے و زرگزرانی نا گچینی نا ضامن ءِ۔ ساڑی آ جاچکاری سرحال نا رداٹ کشت وکشار، توانائی، ٹرانسپورٹ ، واپار و صنعتی کمکاری سی پیک نا اہم ءُ بشخ ءُ۔ دا سڑک، ریلوائی، توانائی نا ڈٹ ، بندرگاہ و خصوصی اقتصادی زون آتون اوار ملک انا پوسکن آ ات و در نا نیٹ ورک آتیٹی زرکاری اتون ملکی راجی و اقتصادی شونداری ناموقع اس فراوان کرینے۔ سرحال اٹی پاننگانے کہ سی پیک پاکستان نا الس کن دیرپا اقتصادی فائدہ و پائیدار شونداری نا کسر ءِ ہرا توانائی نا تنکی تون مون تننگ نا کمک اٹ ہندی مخلوق کن ہزار آ ملازمت ودی کرینے۔ سی پیک نا بناآن پد آن چین پاکستان نا طالب علم آتیکن سرفہرست ہند اس جوڑ مسنے و فنکار ، تعلیم نا چاہندار، سائنس و میڈیا نا کمک اٹ السی کہول آ سوگو رابطہ ءِ، دا ڈٹ مخلوق نا است خواہی تیا پورو سلنگ، اوفتا است ءِ کٹک و اوفتا ذریعہ معاش کن فائدہ ئی ءِ۔ ہڑتوم آ ملک آتا حکومت، کاروباری ادارہ و راج انا غٹ بشخ آتا اسیجائی کوشست آتے اٹ سی پیک کمکاری بھرمی نتیجہ اس دوئی کرے و پاکستان نا تفنگ و علاقائی تین پہ تینی رابطہ غاتیٹی بھاز بھلو کڑد اس ادا کرینے۔ سی پیک نا رداٹ چین 5،200 میگاواٹ بجلی ودی کننگ نا ڈٹ آتیٹی پاکستان نا کمک ءِ کرے وخت اس کہ 886 کلومیٹر مرغن قومی فراوانی نیٹ ورک ءِ پورو کننگانے، داکان بیدس دا ڈٹ انا رداٹ 510 کلومیٹر سڑک تفنگانے، پین دا کہ توانائی نا گرج آتے پورو کننگ کن گوادر اٹی سولرانرجی سیل انا 7000سیٹ خلنگانے۔ سی پیک آن روزگار نا بھلو وارخواہی اس ودی مسنے و گوادر اٹی ودی مروک آ 5000 ملازم آتیان 4000 ہندی ملازم ءُ۔ دا ڈٹ انا اولیکو ریسہ نا پوروی آن پد کشت وکشار، صنعت، سائنس و ٹیکنالوجی نا بشخ آتیٹی چندی ڈٹ آتے اولیتی بنداو تیا بناکننگ انگ ءِ۔ چین بیلٹ اینڈ روڈ انیشیٹو(بی آر آئی) و سی پیک کون آ ڈٹ آتا کمک اٹ دودوربیدگی و تعلیمی تبادلہ غاتا اہمیت ءِ تالان کننگ کن علاقائی بیداری ودی کننگ اٹ اہم ءُ کڑد اس ادا کرینے۔
