اسلام آباد۔ 01 فروری (اے پی پی) گورنر خیبرپختونخوا الیکشن کمیشن نا صوبہ ٹی لس گچین کاری تا بابت تاریخ نا تعین نا چٹھی نا ورندی ءِ ترسا کمیشن ءِ پارینے کہ او صوبہ ٹی امن و ایمنی نا نازرک حالیت آتے مون آ تخے۔ الیکشن کمیشن ءِ گورنر خیبرپختونخواحاجی غلام علی نا کنڈان چیف الیکشن کمشنر سکندر سلطان راجہ ءِ نوشتہ کروک آ چٹھی دوئی مسنے ہراٹی او سیکرٹری الیکشن کمیشن نا کنڈان 29 جنوری آ نوشتہ کروک آ چٹھی نا حوالہ ءِ ترسا اودے پارینے کہ صوبہ ٹی اسمبلی نا تحلیل آن پد پوسکن آ گچین کاری تا اڈتننگ ءِ۔ ولے صوبہ ٹی امن و ایمنی نا حالیت نازرک ءِ۔ تدوک آ منہ دے آن پدریسہ دہشت گرد آتا جلہو مننگ ءِ۔ ہنداخاطران الیکشن کمیشن ءِ دا پارت کننگک کہ او لس گچین کاری تاتاریخ ءِ تخنگ آن مست غٹ فریق، ادارہ و کانود نافذ کروک آ ادارہ غاتون سلابت کے تانکہ لس گچین کاری تے آجو، انصاف و پرامن وڑاٹ اڈتننگ مرے۔
