اسلام آباد۔ 31 جنوری (اے پی پی) بنجائی وزیر ڈٹ بندی، شونداری و اصلاحات پروفیسر احسن اقبال اینو نا ڈیجیٹل دور اٹی نجی و حکومتی چاہندار آتا نیام اٹ سلابت و شریداری ءِ پک کننگ نا پارت کرسا پارینے کہ نجی بشخ و چاہندار آتا سلابت و سلاہ قومی ڈٹ آتا گچین آب اٹ ٹہیفنگ و پوروی کن المی ءِ۔ داہیت ءِ او سے شنبےنادے آ داڑے وزارت ڈٹ بندی نا داخلی ڈٹ و کروک آ خصوصی گام گیج آتا جاچ دیوان نا کماشی ءِ کرسا پارے۔ دیوان اٹی سیکرٹری وزارت ڈٹ بندی، چیف اکانومسٹ، ممبران پلاننگ کمیشن و پروجیکٹ ڈائریکٹر نا بشخ ہلکر، و ڈٹ آتیا حوال تسر۔ دیوان اٹی ای فائیو فریم ورک ، آؤٹ لک 2035، انٹرن شپ پروگرام، 20 پسماندہ انگا ضلع غاتیکن خصوصی ڈٹ جاٹ و نوکاپ زہمی علاقہ غاتا بحالی کن خصوصی گام گیج و ساڑی حالیت آتا جاچ ءِ ہلنگا۔ دیوان اٹی وزارت ڈٹ بندی تون منظوری کن صوبائی حکومت و بنجائی وزارت آتا کنڈان پیش کروک پی سی ون و فیزیبلٹی رپورٹ آتیا نجی بشخ آن سلاہ بٹنگ نا جوان ءُ وڑوڈول اس اختیار کننگ نا فیصلہ کرے۔ احسن اقبال پارت کرے کہ اینو نا ڈیجیٹل دور اٹی نجی و حکومتی چاہندار آتا نیام اٹ سلابت و شریداری ءِ پک کننگے۔ اوپارے کہ نجی بشخ و چاہندار آتا سلابت و سلاہ قومی ڈٹ آتا گچین آب آ ٹہیفنگ و پوروی کن المی ءِ، پی سی ون اٹی چاہندار آتا سلاہ تا بابت جتا اسہ خصوصی سیکشن اسے نا ودکی ءِ کننگے۔ احسن اقبال پارے کہ چیمپیئن آف ریفارمز نادروشم اٹ وزارت ڈٹ بندی تون قومی و جہانی آب انا چاہندار آتا بھلو منشاکار ٹیم اس ساڑی ءِ، بنجائی ڈٹ آتا ڈٹ بندی و پی سی ون نا منظوری نا عمل ءِ پورو خودکار نظام آ گدریفنگ نا گرج ءِ۔ اومستی پارے کہ وزارت ڈٹ بندی غٹ داخلی ڈٹ بندی ، سلابت ، جاری و پوروی نا ریسہ غاتے خودکار نظام آ گدریفنگ کن چیف ٹیکنالوجی آفیسر نا خذمت آتے دوئی کے۔ بنجائی وزیر احسن اقبال پارے کہ بدل مروک آ حالیت آتا خواست آتون ہم گرنچ کننگ کن پاکستان نا 10 بھلا شار تا اول سر آن ڈٹ بندی و ماسٹر پلان اس تیار کننگ نا گام گیج کننگ نا گرج ءِ، دا عمل ءِ زوت پورو کننگے۔
