سلامتی کونسل و یو این اے اوسی نا پشاور جلہو نا مذمت، زہمی تا خاہوت و حکومت پاکستان تون ہمدردی نا درشان

اقوام متحدہ۔ 31 جنوری (اے پی پی) اقوام متحدہ نا سلامتی کونسل پشاور مسیت اٹی دہشت گرد آتا خودکش جلہو نا سخت انگا لوز آتیٹی مذمت ءِ کرسا دا گندہ انگا و لغوری ڈوہ انا زموار آتے اوفتے اوفتا کروک نا سزا ترفنگ نا گرج آ زور شاغانے۔ 15 باسکی سلامتی کونسل نا جنوری کن صدر جاپان نا سفیر اشی کانے کیمی ہیرو نا کنڈان جاری بیان اٹی سانحہ زہمی تا خاہوت و حکومت پاکستان تون ہمدردی نا درشانی ءِ کننگانے و ٹھپی تا زوت دراخ جوڑی کن نیک است خواہی نا درشانی ءِ کننگانے۔ بیان اٹی دا عزم انا درشانی ءِ کننگاکہ سلامتی کونسل نا خڑک دہشت گردی خواہ او ہراکہ دروشم اٹی مرے جہانی امن و سلامتی کن بھلو خطرہ اسے۔ بیان اٹی پاننگانے کہ دا سانحہ نا زموار ، اوڑکن مالی کمک و سرپرستی کروک آتے اوفتے اوفتا کروک نا سزا ترفنگے۔ بیان اٹی غٹ ملک آتیان خواست کننگاکہ او جہانی کانود و سلامتی کونسل نا قرارداد آتا رداٹ تینا زمواری تے ادا کرسا دا باندات اٹی پاکستان نا حکومت و تعلقدار کمامدار آتا کمک ءِ کیر۔ بیان اٹی پاننگانے کہ سلامتی کونسل نا باسک ملک آک دا عزم انا درشانی ءِ کیرہ کہ دہشت گردی نا کارروائی، خواہ اوفتا انت کہ مسخت اس مرے و او دنیا نا ہرابشخ اٹی مرے و اودے ہرکس کہ انجام تس مجرمانہ کارروائی ءُ، و اوفتا ہچ ءُ جواز اس پیش کننگ مفک۔ غٹ ریاست آک اقوام متحدہ نا چارٹر و جہانی کانود بشمول حقوق انسانی نا جہانی کانود، باہوٹ آتا جہانی کانود و انسانی ہمدردی نا جہانی کانود نا رداٹ دہشت گردی نا چٹفنگ کن غٹ وسیلہ غاتے کاریم اٹ اتیر۔ داکان بیدس ہائی ریپریز نٹیٹیو فار یونائیٹڈنیشنز الائنس آف سویلائزیشن (یواین اے او سی) میگوئل اینل موراتینوس پشاور جلہو نا مذمت ءِ کرسا پارینے کہ بیدادی نا غٹ دروشم، شاری و مذہبی ہند آتا برخلاف دہشت گردی ناقابل قبول و بے سوب ءِ و اوفتا امنائی وڑاٹ مذمت ءِ کننگے۔ اوتینا بیان اٹی پارے کہ عبادت گاک مقدس ہند ءُ ہراڑے چندی مذہب آتا پیروکار رکھ و آجوئی اٹ تینا عقیدہ غاتیا عمل کیرہ۔ اومستی پارے کہ امتیاز ، بے سگی و بیدادی نا کارروائی تیٹی ودکی گڑتی نا سوب ءِ۔