اسلام آباد۔ 27 جنوری (اے پی پی) وزیراعظم محمد شہباز شریف پارینے کہ مشکل آتون مقابلہ کروک آ قومک ہی شونداری کیرہ، ملک ءِ ساڑی آ تنکی تیان کشنہ، اومیت ءِ کہ آئی ایم ایف تون معاہدہ ہندا تُو اٹی مریک، تدوک آ حکومت نا کنڈان ادارہ غاتیا بے بنداو دوبہ خلنگ و چینی کمپنی تیا کرپشن نا دوبہ غاتیان چینی کمامدار آتے تکلیف رسینگا، دا تعلقداری تے مست آنبار کننگ کن برف دِیر مننگ اٹی ءِ، ایم ایل ۔ ون ڈٹ انا پوروی ننا اولیت ءِ ، دے و نن خواری کرسا دنیا ٹی تینا گوہوک آ ہند ءِ دوئی کینہ، دنیا ٹی حکومت آک گورننس نا زموار ءُ او ادارہ غاتے چلیفپسہ ، نن زرمبادلہ نا کوڑی تے مون آ تخسا تینا اولیت آتا تعین ءِ کرینن۔ جمعہ نا دے آ وزیراعظم محمد شہباز شریف گرین لائن ٹرین سروس نا بناءِ کرے۔ داوخت آ وزیر ریلوائی خواجہ سعد رفیق ، وزیر خزانہ سینیٹر اسحاق ڈار، وزیر ڈٹ بندی پروفیسر احسن اقبال ئسک ہم تران کریر۔ وزیراعظم دود آن تران کرسا پارے کہ گرین لائن ہرانا بنداو ءِ نواز شریف نا تدوک آ دور اٹی تخنگاسس و بدبختی اٹ بے شمار ایلو ڈٹ آتیانبار دا ڈٹ ہم پد انا حکومت اٹ دم تس، نن دا سروس نا اول سرآن بناءِ کننگ آ نن اللہ تعالیٰ نا شکر ءِ ادا کینہ و وزیر ریلوائی و چینی کمپنی تے مبارکبادی ایتنہ۔ وزیراعظم پارے کہ داسہ ویگن تا معائنہ ءِ کرین دا پوسکن آ آسراتی تیان شپ ءُ، وزیر ریلوائی آؤٹ سورسنگ آ یخین تخک و ساڑی آ دور اٹی شونداری نا زینہ ہندادے کہ داڑان ریلوائی ٹی گچینی بریک و پاکستان ریلوائی ءِ فائدہ مریک۔ اوپارے کہ حکومت آتا کاریم ادارہ غاتے چلیفنگ آخا بلکن گورننس مریک۔ اوپارے کہ حکومت آک کارہ بریرہ پاکستان اینو ہموڑے سلوک ءِ ہراڑے اسہ اسہ پائی ءِ بچفنگ نا کوشست کننگ اُن۔ درملکی زرمبادلہ نا کوڑی تا حالیت آتے ہرسا نن اولیت آتے مقرر کرینن ہراٹی خور و دوائی تا درآمد ءِ اولیت تننگانے۔ پورو اومیت ءِ کہ آئی ایم ایف تون ہند اتُو معاہدہ مریک و دامشکل آتیان پیش تمنہ۔ اوپارے کہ دامشکل ءُ وخت اسے، پاکستان دنیا ٹی چاگڑدی کچٹی ٹی بیرہ اسہ درسد بشخ تخنگ آن پد ہم اونا گواچی مس و بدترین نوکاپ بس۔ سیوتی حکومت دے و نن ملک ءِ مشکل آتیان کشنگ کن کوشست کننگ اٹی ءِ، خواجہ سعد رفیق میرٹ نا بالادستی آ یخین تخک، ریلوائی ءِ ایلو ادارہ غاتیانبار مشکل آتا مون تروک ءِ، قوم تا زند اٹی مشکل بریک کاہک اوفتے تون مون تروک آ قومک ہی شون ہلیرہ ہندا دا مخلوط حکومت نا وژن ءِ و داڑا پورو وڑاٹ عمل کننگ انگ ءِ۔ اوپارے کہ ایم ایل ون ننا اولیتی ایجنڈا ٹی اوار ءِ۔ چین نا حکومت دا ڈٹ ءِ ترندی اٹ مون آ دننگ کن سنبرینگوک ءِ۔ تدوک آ حکومت اٹی ادارہ غاتیا بے بنداو دوبہ خلنگ و چینی کمپنی تیا کرپشن نا دوبہ خلنگ آن چینی کمامدار آتے تکلیف و اذیت رسینگا، ساڑی آ چین انا دورہ غاچین ننے پبی و گرم جوشی اٹ بخیر کرے، چینی زعما و الس پاکستان تون بھاز مہرومریبت کیک، تدو ک آ چارسال اٹی تعلقداری تے ہرا ٹھیس رسینگا اوفتے پدی اتنگ آسان ءُ کاریم اس اف ولے برف دِیر مننگ اٹی ءِ، چینی حکومت و الس نا منت وار اُن کہ او پاکستانی الس کن بے پناہ مہرومریبت نا جوزہ تخرہ، ننے تینا نت تیا سلنگ کن دا رویہ ءِ بدلیفوئی مریک، خواری ءِتینا شعار کروئی مریک، نن ہراوخت اسکان ایلو تا سیبو آ مرینہ۔ دا سفر مشکل ضرور ارے ولے نن دے و نن خواری کرسا ملک ءِ مون آ دینہ و ملک تینا گوہوکا ہند ءِ دوئی کیک۔
