اسلام آباد۔ 27 جنوری (اے پی پی) وزیراعظم محمد شہباز شریف پارینے کہ چترال اٹی لوڈشیڈنگ ءِ کم کننگ کن دمدستی گام گیج کننگے، چترال نا الس ءِ پین تہاری تیٹی تخنگ کپنہ۔ وزیراعظم آفس نا میڈیا سیل آن جاری بیان نا رداٹ وزیراعظم محمد شہباز شریف نا کماشی ٹی چترال اٹی بجلی و انفراسٹرکچر نا ویل آتا ایسری کن بڑزکو کہول انا دیوان اس اڈ ہلک ۔ دیوان اٹی وزیر پاور خرم دستگیر خان، چیئرمین واپڈا لیفٹیننٹ جنرل (ر) سجاد غنی، سیکرٹری پاور و تعلقدار بڑزکو کمامدار آک بشخ ہلکر، داکان بیدس چترال آن نوید الرحمان، شہزادہ افتخار الدین ، عبدالولی خان، نیا ز احمد، شوکت ملک، محمد وسیم، حاجی غفار خان، استفند یار خان ، منیر احمد، منظور احمد، عمران الملک ، محب الرحمان ، سلامت خان، جاوید وزیر، طارق نصیر، محمد اعظم خان، ظفر حیات، مولانا عبدالرحمان ، انعام اللہ ، رحمت ولی شاہ و خواجہ امان اللہ اوار ئسر۔ اوڑدہی ٹی بشخ ہلوک آک وزیراعظم ءِ چترال اٹی لوڈشیڈنگ و انفراسٹرکچر نا ویل آتیان معلومدار کریر۔ بشخ ہلوک آک وزیراعظم نا نوکاپ اٹی چترال نا زہمی تا کمک و بحالی کن ذاتی است خواہی آ منت واری ءِ ہم ہرفیر۔ وزیراعظم چترال نا غٹ ویل آتا ایسری کن تعلقدار کمامدار آتے دمدستی وڑاٹ گام گیج کننگ نا پارت جاری کرے۔ وزیراعظم پارے کہ چترال نا بجلی نا ویل آتا ایسری ٹی پین ہرے ءِ ہچ ءُ حالیت اسے ٹی قبول کپرہ۔ وزیراعظم پارت کرے کہ وزیر توانائی و سیکرٹری پاور پشاور اٹی داڑا دیوان کرسا زوت کنے رپورٹ ایتے۔ چترال اٹی بجلی نا متکن آ فراوانی نظام ءِ بدل کرسا دمدستی وڑاٹ پوسکن ءُ سسٹم خلنگے۔ وزیراعظم پارے کہ وزارت پاور پختونخوا انرجی ڈویلپمنٹ آرگنائزیشن تون ملسا دمدستی لائحہ عمل اس طے کے۔ چترال اٹی شونداری ڈٹ و حکومتی ادارہ غاتیٹی ہندی مخلوق ءِ اولیتی بنداو تیا نوکری تا فراوانی ءِ پک کننگے۔ وزیراعظم پارے کہ چترال اٹی انفراسٹرکچر نا ویل آتا دمدستی ایسر کننگے، نوکاپ زہمی تے ملوک آ امداد آ دمدستی وڑاٹ رپورٹ پیش کننگے۔ پسماندہ علاقہ غاتا شونداری و ہموجاگہ نا مخلوق ءِ اسہ وڑ شونداری نا وارخواہی فراوان کننگ حکومت نا اولیت ءِ۔
