اسلام آباد۔ 27 جنوری (اے پی پی) بنجائی وزیر ریلوائی خواجہ سعد رفیق پارینے کہ ریلوائی نا ڈغارتا کمرشل کاریم اٹ اتنگ نا بابت بروک آ دہ دے اٹی رولز جوڑ کرسا کابینہ ٹی اتینہ، صوبہ غاک پاکستان ریلوائی نا ڈغار تے اونا دوٹی ایتر، ریلوائی ٹی پین کوچ اوار کننگ انگ ءِ۔ جمعہ نادے آ بنجائی وزیر ریلوائی خواجہ سعد رفیق گرین لائن ٹرین نا بنائی دود آن تران کرسا پارے کہ وزیراعظم نا منت وار اُن کہ او ننا سلہ غا پاکستان ریلوائی نا کنڈان چلینگوک آ گرین لائن نا بنائی دود اٹی بشخ ہلک ، مستین اٹ نواز شریف نا کماشی ٹی نن مارگلہ غان پوسکن ءُ گرین لائن ٹرین اس چلیفیسن ہرا نواز شریف حکومت نا چٹنگ آن پد بند کننگا، نن چین آن بوگی ہلنگ نا معاہدہ کرین، ہرانا رداٹ دونیم سد پوسکن ءُ ویگن ملوئی ءِ اوفتیان 36 بسنو، گڑاس بوگی داڑے ہم جوڑ مریرہ و اومیت ءِ کہ آخبت پیشن آن خواہفوئی تمپک۔ اوپارے کہ داٹرین سروس پوسکن آ آسراتی تیان شُپ مریک اوفتے انٹرنیٹ نا آسراتی ہم دوئی مریک، دا سروس اسلام آباد آن کراچی اسکان ءِ، داٹی 2200 آن زیات مسافر سفر کننگ کیرہ، پاکستان نا شاریک داسروس آن فائدہ ہرفر۔ اوپارے کہ 2013 ٹی ننا حکومت نا بننگ آ ریونیو 18 ارب وخت اس کہ ہراتم حکومت ءِ اِلان تو 54 ارب روپئی ئسک، ہندا وڑ ہمووخت آ ہم ہراتم نن اقتدار ءِ سنبھالان تو ریلوائی نسخان اٹی ئسک، نن دُوارہ زیروآن بناءِ کرینن، نوکاپ ہم ریلوائی نا مخ ءِ پرغااِلا نن تینا کچ اٹنگا وسیلہ غاتے اٹ ریلوائی نا نظام ءِ بحال کرین۔
