اسلام آباد۔ 27 جنوری (اے پی پی) سینیٹ نا باسک آک سویڈن اٹی قرآن پاک نا بے حرمتی نا واقعہ نا پبی لوز آتیٹی مذمت ءِ کرسا پارینے کہ سویڈن اٹی قرآن پاک نا بے حرمتی نا است ہسون واقعہ انسانی حق، انسانیت نا شرف نا بھلا خلاف ورزی ءِ، مسلمان ملک آک یکجا مرسا دا باندات آ سخت موقف اس تینا کیر، سویڈن کون آ واقعہ غاک مسلمان تا برخلاف سازش ءُ، ننے داوڑنا واقعہ غاتا برخلاف یکجا مرسا ترندی اٹ گام گیج کروئی مریک، جہانی کہول آ اسلاموفوبیا نا برخلاف کانود سازی مرے۔ جمعہ نادے آ سینیٹ نا دیوان اٹی سویڈن اٹی قرآن پاک نا بے حرمتی نا واقعہ نا برخلاف قرارداد آ شرہ ٹی بشخ ہلسا سید یوسف رضاگیلانی پارے کہ سویڈن اٹی قرآن پاک نا بے حرمتی نا واقعہ افسوزناک ءِ، نن دا گندہ انگا گام انا برخلاف بایدے برانز کین، ہراٹی پارلیمنٹ نا باسک آک بشخ ہلیر، او آئی سی ہم داواقعہ نا مذمت ءِ کرینے، دا انسانی حق انا خلاف ورزی ءِ، پاکستان دا واقعہ نا مذمت ءِ کرینے۔ سینیٹر مشتاق احمد پارے کہ سویڈن اٹی مروک آ واقعہ یک و نیم ارب مسلمان تیا جلہو ءِ ، نیدر لینڈ و سویڈن نا حکومت نا موکل تننگ نا گام انا مذمت ءِ کیوہ، مسلمان ملک آک یکجا مرسا دا باندات آ سخت ءُ موقف اس تینا کیر۔ سینیٹر انوارالحق کاکڑ پارے کہ سویڈن واقعہ نا پبی مذمت ءِ کینہ، قرآن پاک مسلمان تا است آتیٹی رکھوک ءِ، پوسکن آ دور اٹی اسلاموفوبیا خطرناک حالیت اختیار کننگ اٹی ءِ۔ سویڈن و نیدر لینڈ نا سفیر ءِ چٹھی اناکمک اٹ ایوان نا جوزہ غاتیان معلومدار کننگے۔ سینیٹر مولانا فیض محمد پارے کہ قرآن پاک آخیریکو کتاب ءِ و داٹی غٹ انسان تا پورو زند انا بارواٹی پرمان ءِ، سویڈن کون آ واقعہ غاک مسلمان تا برخلاف سازش ءُ، دا واقعہ غاتا ردعمل آ مسلمان تے دہشت گرد گوندنگک، اسلام اٹی تو انسان انت ساہدار تا ہم حق ارے، انت داوڑنا مذہب دہشت گردی ہیل ایتک، دا ملک آتا بائیکاٹ ءِ کننگے، صوبہ غاتیٹی دا مسخت نا برخلاف پبی موقف اس تینا کننگک۔ سینیٹر تاج حیدر پارے کہ خواجہ اکرم صلی اللہ علیہ و آلہ وسلم نا غٹ انسانیت کن رحمت عالم مرسا بس، قرآن پاک راجی، زرگزرانی و مشکل آتا ایسری اس پیش کیک، آجوئی، بریبری و ایلمی نا کلہو قرآن نا عقیدہ توحید نا کمک اٹ تس، قرآن پاک نا بے حرمتی و خواجہ اکرم صلی اللہ علیہ و آلہ وسلم نا شان اٹی گستاخی کننگک، اسلام امن و رواداری نا کلہو ایتک، نن داوڑنا واقعہ غاتا برخلاف سیوت نا بایدے درشانی ءِ کین۔ سینیٹر فیصل جاوید پارے کہ سویڈن اٹی قرآن پاک نا بے حرمتی نا واقعہ نا ترندی اٹ مذمت ءِ کینہ، مسلم ملک آتون اوار اوار غیر مسلم ملک آک ہم داوڑنا واقعہ غاتا مذمت ءِ کننگ ءُ، پاکستان داوڑنا باندات ءِ اقوام متحدہ ٹی ہرفنگک ہراڑا اقوام متحدہ اسلاموفوبیا نا برخلاف دے اس اڈتننگ نا پڑو کرے۔ داباندات آ ننے یکجا مرسا ترندی اٹ گام گیج کروئی مریک، روس بیان تس کہ پیغمبر اسلام نا توہین آجوئی سلاہ درشانی اف، دا ٹک ءِ دیکی ملک آتے سمجھوئی مریک کہ داوڑنا واقعہ غاتیان مسلمانک اخس ڈکھیائی وکرب انا گواچی مننگ کیرہ، میڈیا، سول میڈیا تون اوار ایلو ذریعہ غاتے کاریم اٹ اتنگ نا گرج ءِ، پی ٹی آئی نا حکومت اسلاموفوبیا نا برخلاف پبی توار بڑز کرے۔ سینیٹر کامران مائیکل پارے کہ مسیح تتون اوار اقلیت آتا کنڈان دا شرانگیز واقعہ نا مذمت ءِ کیوہ، نن مذہبی رواداری، اخوت و ایلمی کن بھلو خواری اس کرینن، شرپسند آتے آجوئی سلاہ درشانی و انسانی حق انا آڑ اٹ کس اسے نا جوزہ غاتون گوازی کننگ نا موکل تننگ مفک، دا مذہب امن، اخوت ، ایلمی و ہم گرنچی نا درس ایتک۔ سینیٹر سعدیہ عباسی پارے کہ سویڈن واقعہ نا برخلاف ایوان اٹ قرارداد منظور کرسا اونا سفارت خانہ غا گدریفنگے۔ دا انسانیت نا برخلاف ڈوہ اسے۔
