اسلام آباد۔ 27 جنوری (اے پی پی) بنجائی وزیر ڈٹ بندی و شونداری و اصلاحات پروفیسر احسن اقبال پارینے کہ ملک اٹی سیاسی سوگوی و تسلسل اٹ زرگزرانی مشکل آتیان پیش تمنگ مریک، ٹیکنیکل پاکستان نا بالادستی کن انجینئرز کیڈر سروس نا بایدے بناءِ کننگے۔ جمعہ نادے آ گرین لائن ٹرین سروس نا بنائی دود آن تران کرسا اوپارے کہ تینا برآمد آتے بروک آ پنچ سال اٹی 100 ارب ڈالر آن بڑزا دین تو نن سرسہب مننگ کینہ، ریلوائی پاکستان نا برآمد آتیٹی ودکی کن اہم کڑد ادا کننگ کیک، داڑکن ایم ویل ون نا ڈٹ 2017 ٹی تیار کننگا۔ اوپارے کہ دا ڈٹ انا کمک اٹ نن ریلوائی ٹریک ءِ 160 کلومیٹر فی گھنٹہ نا رفتار اٹ تالان کننگ نا عمل نا بناءِ کرین ولے حکومت بدل مننگ آن پد دا ڈٹ ءِ یخ انگا خانہ ٹی تخنگا و اینو نن ہموکان دُوارہ دانا بناءِ کننگ اُن ، چین دا ڈٹ انا رداٹ بوگی تیار کرسا گدریفے ولے نن ایم ایل ون ءِ گڈیکو دروشم اس تننگ کتون، سیاسی نزوری و پالیسی تا چرجوئی مفننگ نا سوب آن داویل آک ءُ، دنیا ٹی کچٹی ٹی ننا ہچ ءُ کڑد اس اف ولے ننے 30 ارب ڈالر نا نسخان ہرفوئی تما، ساڑی حکومت تدوک آ دور انا زرگزرانی کچٹی تا بھاریم ءِ شیف کننگ ءِ، نن چیلنج آ پورو سلنہ و ملک ءِ دا تنکی آن کشنہ۔ اوپارے کہ قومی انتظامی پنجر اٹ انجینئر ز نا کیڈر ساڑی اف، ٹیکنیکل پاکستان ءِ بالادستی تننگ کن دا کیڈرنا ہم بناءِ کننگ وخت انا اہم ءُ گرج اسے تانکہ پاکستان ء، مون آ دننگ مرے۔ او گرین لائن ٹرین سروس نا بناء ءِ کننگ آ وزارت ریلوائی و وزیر ریلوائی ءِ مبارکبادی تس۔
