اسلام آباد۔ 27 جنوری (اے پی پی) بنجائی وزیر کانود وانصاف سینیٹر اعظم نذیر تارڑ پارینے کہ سویڈن اٹی قرآن پاک نا بے حرمتی نا واقعہ قابل مذمت ءِ ، حکومت اقوام متحدہ تون اوار ہر فورم آ دا بابت تینا برانز ءِ ریکارڈ کرفک، حکومت تینا جہانی و سفارتی زمواری تیان پورو وڑاٹ معلومدار ءِ و دا باندات آ ہچ ءُ ڈیوالئی اس کننگپک۔ جمعہ نادے آ سینیٹ نا دیوان اٹی سویڈن اٹی قرآن پاک نا بے حرمتی نا واقعہ نا بابت قرارداد آ گپ وتران کرسا سینیٹر اعظم نذیر تارڑ پارے کہ قرآن پاک ءِ اللہ تعالیٰ حضرت محمد صلی اللہ علیہ و آلہ وسلم نا وساطت اٹ غٹ اقوام عالم کن نازل کرینے، اوٹی ایلو تا رائے نا شرف ءِ کننگ، میراتی حق، انسانی حق اتون اوار ایلو ویل آتا ایسر ساڑی ءِ، دا بیرہ مسلمان تیکن آخا، عالم انسانیت کن ءِ، مہذب قوم تیٹی داوڑنا پرائے گندہ ذہنیت نا مننگ فکرانا ہیت اسے، داواقعہ نا اخس کہ مذمت ءِ کننگے کم ءِ، پاکستان اسہ زموار ءُ ملک اسے، نن جہانی کانود نا رداٹ تینا برانز ءِ ریکارڈ کرفنگ ناحق تخنہ، غیرمسلم ایڑھ ایلمک ایوان اٹ مدام دا باندات آ ننتون تفینو، حکومت ہر فورم آ دا باندات ءِ ہرفک، حکومت تینا جہانی و سفارتی زمواری تیان پورووڑاٹ معلومدار ءِ، و داباندات آ ہچ ءُ ڈیوالئی اس کننگپک، مستین اٹ داوڑنا واقعہ غاتیا ملکیت آتے خاخر تننگا۔ نن زموار ءُ ریاست اسے نا وڑاٹ تینا کڑدءِ ادا کینہ، دترنا آخیریکو پُڑی اسکان تینا دین نا رکھ ءِ کینہ، حکومت داباندات آ اقوام متحدہ یورپی ملک آتون اوار ہر فورم آ تینا زمواری تے پورو کیک۔
