جنیوا۔ 27 جنوری (اے پی پی) پاکستان جہانی و علاقائی سلامتی نا خراب مروک چاگڑد و بھارت ءِ روایتی و غیرروایتی سلہہ غاتا بہاکننگ آ گڑتی نا درشانی ءِ کرسا پارینے کہ داڑان سویلی ایشیا ٹی سٹریٹجک سوگوی ءِ نسخان رسینگ انگ ءِ۔ جنیوا ٹی اقوام متحدہ کن پاکستان نا آخبتی نمائندہ خلیل ہاشمی بھارت نا پن ءِ ہلنگ آن بیدس سلہہ غاتا چٹفنگ نا بابت کانفرنس آن تران کرسا پارے کہ بنداوی وڑاٹ غٹ آن بھلا ریاست نا ڈیہہ ٹی بالادستی نا است خواہی آ تالان پالیسی تا سوب آن علاقائی سلامتی نا ساکھ ء، پدریسہ نسخان رسینگ انگ ءِ۔ جہانی برادری نا سلہہ غاتا کنٹرول و سلہہ غاتا چٹفنگ نا معاہدہ غاتیا گپ وتران کن 65 باسکی فورم نا دیوان سے شنبے نادے آ بناکرے۔ پاکستانی نمائندہ پارے کہ بالادستی نا است خواہی آ تالان دا پالیسیک چندی ذریعہ اٹ روایتی و غیرروایتی سلہہ، ٹیکنالوجی و پلیٹ فارم آتیان سوگوی دوئی کرے۔ چندی ذریعہ و پلیٹ فارم آتیان روایتی و غیرروایتی سلہہ و ٹیکنالوجی نا فیاضانہ فراوانی آن ڈیہہ ٹی تینا بالادستی ءِ قائم کننگ نا است خواہی آ تالان بھارتی پالیسی تے سوگوی ملانے۔ 2008 اٹی بھارت و امریکہ نا نیام اٹ طے مروک آ سویلین جوہری کمکاری نا معاہدہ نا کنڈا اشارہ کرسا اوپارے کہ بھارت ءِ دا سوگوی جوہری سلہہ غاتا بے تالانی نا اصول، قدر و روایت آتیان چپ جوہری پروگرام آ استثنیٰ تننگ آن ہم ملانے۔ اوپارے کہ سویلی ایشیا ٹی دا پیش رفت نا اثر آک پیدوار ءُ ہرافتا سوب ڈیہہ ٹی سٹریٹجک سوگوی چٹنگ ءِ۔ اوپارے کہ غٹ آن بھلا ریاست سٹریٹجک تسلط نا است خواہی ءِ عملی دروشم اس تننگ نا کوشست آتے برجاتخانے و خطرناک نظریہ غاتے عملی دروشم اس تننگ ءِ۔ پین فریشانی نا ہیت دادے کہ دا پیش رفت بھارت نا کنڈان جہانی کانود خاص وڑاٹ اقوام متحدہ نا سلامتی کونسل نا قرارداد آتیا عملدرآمد آن انکار اٹی شدت ودی کننگ اٹی ءِ۔
