اسلام آباد۔ 26 جنوری (اے پی پی) وزیر مملکت خارجہ امور حنا ربانی کھر 30 جنوری آ جنیوا ٹی اقوام متحدہ نا انسانی حق کونسل اٹی پاکستانی ڈل انا کماشی ءِ کیک۔ داہیت ءِ دفترخارجہ نا ترجمان ممتاز زہرا بلوچ پنچ شنبےنادے آ پریس حوال اٹی پارے۔ اوپارے کہ وزیر مملکت انسانی حق کونسل اٹ یونیورسل پیریاڈک ریویو نا عمل نا رداٹ پاکستان نا قومی شونداری نا رپورٹ ءِ پیش کیک، دا پاکستان نا چارمیکو جاچ مریک، داکان مست 2008، 2012و 2017 ٹی داعمل نا رداٹ پاکستان نا جاچ ءِ ہلنگانے۔ ترجمان پارے کہ وزیر مملکت تینا پریزنٹیشن اٹ پاکستان نا کنڈان تدوک آ پنچ سال اٹی انسانی حق انا رکھ اکن کروک آ کانودی، پالیسی، انتظامی و ادارہ جاتی گام گیج آتا خاکہ اس پیش کیک، داکان بیدس او جہانی انسانی حق انا بابت پاکستان نا اہم شریداری ءِ ہم تالان کیک۔ داہیت ذکر انا قابل ءِ کہ یونیورسل پیریاڈک ریویو2007 اٹی جوڑ کروک آ انسانی حق کونسل نا اسہ اہم ءُ وڑوڈول اسے ہرانا رداٹ اقوام متحدہ نا غٹ باسک ملک آتا انسانی حق انا ریکارڈ نا ہر چارآن پنچ سال پد جاچ ءِ ہلنگک۔
