اسلام آباد۔ 26 جنوری (اے پی پی) وزیراعظم آزاد کشمیر سردار تنویر الیاس خان پارینے کہ بھارت دنیا نا مون آ تینے جمہوری و سیکولر ملک اس مننگ نا دعویٰ کیک ولے ہموڑے اقلیت آک رکھ افس، بھارت نا پِن انا یوم جمہوریہ ننکن تہار ءُ دے اسے۔ مچ آ دنیا ٹی رہینگوک آ کشمیری و پاکستانیک اینو نادے ءِ تہاردے انا وڑاٹ اڈتننگ اٹی ءُ۔ بھارت نا پن انا یوم جمہوریہ نا وخت آ تینا بیان اٹی اوپارے کہ بھارت نا غیرکانودی کوزہ ٹی جموں وکشمیر نا مسلمانک ہرہمو قربانی ءِ تسر ہرانا درور ملیپک۔ تحریک آجوئی کشمیر کن کشمیریک تینا مسٹ میکو چین ءِ ندر کرینو، بھارت اقوام متحدہ ٹی کشمیری تے حق خودارادیت تننگ نا تینا قول آ سلپننگ ءِ۔ وزیراعظم آزاد کشمیر پارے کہ کشمیر ہچ ءُ حالیت اسے ٹی بھارت نا بشخ اف و نئے مننگ کیک۔ کشمیریک تینے پاکستانی تکرہ و پاکستان نا پوروی کن جنگ تننگ ءُ۔ ہندوستان نا مکروہ و انسانیت نا خونی دروشم دنیا نا مون آ بھاز بے وڑ بے نقاب مسنے۔ بھارت کشمیر آ غاصبانہ کوزہ کرینے۔ وزیراعظم پارے کہ جمہوری و سیکولر ملک انا دعویٰ کروک آ ہندوستان دنیا ءِ ریفنگ نا غٹ آن بھلا فراڈ ءِ۔ بھارت کشمیری لمہ، ایڑھ، بزرگ و چناتیا انسانیت سوز ظلم کرے۔ وزیراعظم پارے کہ ہندوستان تینے جمہوری ملک اس پارفنگ نا لائق اف، ہفت دہائی آن ہندوستان تینا غیرکانودی کوزہ ٹی جموں وکشمیر اٹی ظلم انا زی آ ظلم کرینے۔ مقبوضہ کشمیر نا مسلمان تیان بیدس بھارت نا کیہی ریاست آتیٹی مخلوق بھارت آن آجوئی کن جنگ تننگ ءُ۔ ہندوستان اٹ اقلیت آتیکن ہچ ءُ جاگہ اس اف۔
