اسلام آباد۔ 26 جنوری (اے پی پی) حریت راہشون یاسین ملک نا اُرائی مشعال حسین ملک پارینے کہ جمہوریت نا لویس اٹ بھارت پن انا” ری پبلک ڈے ” اڈتننگ ءِ، بھارت دنیا ءِ ریفنگ کن دا دے ءِ اڈ ایتک، بھارتی فوج تدوک آ 75 سال آن مچ آ کشمیری قوم ءِ دتر اٹ سِلنگ ءِ۔ بھارت نا پن انا یوم جمہوریہ غا تینا بیان اسے ٹی مشعال ملک پارے کہ جمہوریت نا لویس اٹ بھارت کشمیری تا نسل کشی اٹی لگوک ءِ۔ جموں وکشمیر اٹی لکھ آتا کچ اٹی تعینات بھارتی فوج کشمیری تا جون تے سم تے اٹ خُلنگ ءِ۔ بھارتی فوج آن کشمیری زالبول آتا عزت اسکان رکھ اف، بھارتی فوج کشمیری تا اُرا تے خاخر تننگ اٹی ءِ۔ مشعال ملک پارے کہ بھارتی فوج آن کودک آک ہم رکھ افس، بھارتی حکومت سیاسی جہد آ کشمیری راہشون تیا دروغ انا مقدمہ جوڑ کرینے۔ دہ لکھ فوج اتون بھارتی حکومت پنجا لکھ ہندوستانی تے ہم کشمیری شناخت تس۔ مشعال ملک پارے کہ کشمیری تیا پنجا لکھ ہندوتے ہم مسلط کننگا، مقبوضہ کشمیر بھارتی فوج انا کالونی اس جوڑ مسنے۔ دنیا بھارت نا پن انا جمہوریت نا پٹی ءِ تینا خن تیان اسہ کنڈ کے و بھارت نا غیرکانودی کوزہ ٹی جموں وکشمیر اٹی ظلم و جور ءِ ہُرے۔
