سرینگر۔ 26 جنوری (اے پی پی) کنٹرول لائن نا ہڑتوم آ کنڈ و مچ آ دنیا ٹی رہینگوک آ کشمیریک اینو پنچ شنبے نادے آ بھارت نا یوم جمہوریہ ءِ تہار دے انا وڑاٹ اڈتننگ اٹی ءُ تانکہ جہانی برادری آ زور شاغنگ مرے کہ او بھارت نا کنڈان کشمیری الس ءِ حق خودارادیت تننگ آن پدریسہ انکار نا نوٹس ءِ ہلے۔ کشمیر میڈیا سروس نا رداٹ تہار دے اڈتننگ نا کال ءِ کل جماعتی حریت کانفرنس تسوسس۔ کوزہ گیر بھارتی انتظامیہ اینو یوم جمہوریہ نا وخت آ مقبوضہ جموں وکشمیر اٹی رکھی گام گیج آتا پن آ چھاپہ و پٹنگ نا کارروائی تا چرجوئی ءِ ترند کرینو۔ سری نگر نا کرکٹ اسٹیڈیم، ہراڑے اینو پن انا بھارتی یوم جمہوریہ نا مرکزی دود مننگ اٹی ءِ، نا کنڈا ہنوک آ غٹ سڑک آتے خاردار تارتے اٹ سیل کننگانے۔ بھارتی فوجی و پولیس کارندہ غاک سرینگر و مقبوضہ علاقہ نا ایلو شار و خلق آتا داخلی و خارجی کسرتیا گاڈی، مسافر و راہگیر آتا پٹنگ نا مہم ءِ ترند کرینو۔ کل جماعتی حریت کانفرنس نا راہشونک سرینگر اٹی جاری تینا بیان تیٹی پارینو کہ بھارت جمہوری ملک اس پاننگ نا اسُل حقدار اف انتئے کہ او کشمیری تا حق خودارادیت طاقت نا زور آ سلب کرینے۔
