اسلام آباد۔ 26 جنوری (اے پی پی) کل جماعتی حریت کانفرنس آزاد جموں وکشمیر شاخ انا مسکوہی کنوینر محمد فاروق رحمانی پارینے کہ کشمیری الس اینو بھارت نا پن انا یوم جمہوریہ ءِ تہارد ے انا وڑاٹ اڈتننگ اٹی ءُ انتئے کہ او جموں وکشمیر آ فوجی زور انا زی آ کوزہ کرینے۔ کشمیر میڈیا سروس نا رداٹ محمد فاروق رحمانی اسلام آباد اٹی جاری اسہ بیان اسے ٹی پارے کہ بھارت جارحیت کرے و 1947 اٹی جموں وکشمیر اٹی فوجی دستہ گدریفے و ولدا کشمیر آ اقوام متحدہ نا سلامتی کونسل نا قرارداد آتا خلاف ورزی ءِ کرے۔ اواست ہسونی نا درشانی ءِ کرے کہ مودی نا کماشی ٹی فلسطائی بھارتی حکومت 2019 اٹی جموں وکشمیر نا خصوصی حیثیت ءِ منسوخ کرے و مقبوضہ علاقہ ٹی تینا نوآبادیاتی پالیسی ءِ مون آ دننگ کن اونا فوجی گھیڑ کرے۔ اومستی پارے کہ بھارت مقبوضہ علاقہ ٹی بھارتی ہندو تے جاگہ تننگ کن مقبوضہ علاقہ نا ڈومیسائل کانود ترمیم کرے و او داتم اسکان لکھ آ غیرکشمیری تے علاقہ نا ڈومیسائل سرٹیفکیٹ تسنے۔ اوپارے کہ بھارتی مسلمان تے ہم تینا ہی گل زمین آ غلام جوڑ کننگانے و مودی حکومت شہریت ترمیمی ایکٹ نا کمک اٹ اوفتے ملک آن کشنگ خواہک۔ محمد فاروق رحمانی پارے کہ مسلمان تے پاننگانے کہ او ہندو مریر رہینگر ورنہ پاکستان آ کار۔ اوپارے کہ گجرات اٹی ہزار آ مسلمان تا خون مودی نا فسطائیت نا اسہ پیدوار ءُ درور اسے۔ اوپارے کہ بی بی سی گجرات مسلم کش پھسات آتا بابت تینا دستاویزی فلم اٹی مودی نا سفاک دروشم ءِ جوان وڑاٹ بے نقاب کرینے۔
