اسلام آباد۔ 25 جنوری (اے پی پی) پارلیمنٹ ہاؤس نا ماڑی ٹی بجلی نا شارٹ سرکٹ فالٹ ءِ مُر کرسا کلیئرنس تننگا، اینو (پنچ شنبے آن ) معمول نا پارلیمانی سرجز آتا بنامریک۔ قومی اسمبلی سیکرٹریٹ نا رداٹ سخت خواری و پدریسہ کوشست آتیان پد تعلقدار کمامدار آک دا خرابی ءِ مُر کننگ اٹ سرسہب مسنو ہراٹی منہ دے مست پارلیمنٹ نا ماڑی ٹی شارٹ سرکٹ مسوسس۔ چیئرمین سینیٹ محمد صادق سنجرانی و اسپیکر قومی اسمبلی راجہ پرویز اشرف جم کارروائی تا چاروکی ءِ کریر و آخبت ناخوشگوار واقعہ غاتیان بچنگ کن غٹ رکھی گام گیج اختیار کننگ نا پارت کریر۔ ہڑتوم آ دیوان تے پدبٹنگاسس و داسہ نظرثانی مروک شیڈول نا رداٹ دُوارہ بناکیرہ۔ سینیٹ نا دیوان 26 جنوری 2023 آ سہب انا 11 بجہ غا و قومی اسمبلی نا دیوان 27 جنوری 2023جمعہ نادے سہب انا 11 بجہ غا تینا تینال ہال اٹی مریرہ۔ مسہ دے انا وقفہ ٹی چندی الیکٹریکل فالٹ آتے مر کننگ کن پورو الیکٹریکل آڈٹ کننگا ہراکہ حساس الیکٹرانک گیجٹس و جم وائرنگ نا بابت ئسر۔ چیئرمین سینیٹ و اسپیکر قومی اسمبلی نا موقف ئس کہ انسانی رکھ بھاز المی ءِ و نظام اٹی ساڑی خامی تے مر کننگ کن ہرممکن کوشست کننگے۔