اسلام آباد۔ 25 جنوری (اے پی پی) اسلام آباد چیمبر آف کامرس اینڈ انڈسٹری (آئی سی سی آئی) نا صدر احسن ظفر بختاوری پارینے کہ آئی سی سی آئی زالبول آتا جہانی دے انا وخت آ کاروبار تون اوار ایلو بشخ آتیٹی نمان سرسہبی دوئی کروک آ زالبول آتے ایوارڈ ایتک تانکہ ملک انا شونداری ٹی اوفتا کڑد ءِ امنا کننگے، زالبول کل آبادی نا کم و ود نیمہ ءُ و حکومت زرگزرانی سرجزآتیٹی اوفتا کڑد ءِ ودفنگ کن سازگار پالیسی جوڑ کے ہراڑان اوفتے واکدار کننگ نا کسر آوار مریک و ملک ترندی اٹ زرگزرانی شونداری دوئی کیک۔ داخیال آتا درشانی ءِ او چیمبر نا دورہ غا بروک آ زالبول انٹرپرینیورآتا اسہ ڈل اسے تون گپ وتران کرسا کرے۔ ڈل اٹی بانی صدر حیدرآباد ویمن چیمبر آف کامرس اینڈ انڈسٹری بینش افتخار قادری ، صدر اسلام آباد ویمن چیمبر آف کامرس اینڈ انڈسٹری رضوانہ آصف ، بانی صدر ثمینہ فاضل، مسکوہی صدر اسلام آباد ویمن چیمبرآف کامرس اینڈ انڈسٹری نعیمہ انصاری و ایلوفک اوار ئسر۔