اسلام آباد۔ 24 جنوری (اے پی پی) وزیرخارجہ بلاول بھٹو زرداری پارینے کہ غٹ ملک آتے موسمیاتی بدلی تتون مون تننگ کن ہلہلہ ئی بنداو تیا کاریم کروئی مریک، گلوبل وارمنگ نا سوب آن پاکستان اٹی گلیشیئر ترندی اٹ دِیر مننگ ءِ، پاکستان ویل آتاایسری کن غٹ ملک آتون اواری اٹ کاریم کننگ آ یخین تخک، ڈیہہ نا گچینی کن اواری اٹ کاریم کننگ نا گرج ءِ۔ داخیال آتا درشانی ءِ او سے شنبےنادے آ ازبکستان نا دارالحکومت تاشقند اٹی اقتصادی کمکار تنظیم (ای سی او) نا 26 می وزارتی کونسل نا دیوان آن تران کرسا کرے۔ وزیرخارجہ بلاول بھٹو زرداری ڈیہہ نا گچینی کن اواری اٹ کاریم کننگ نا گرج آ زور شاغسا پارے کہ دنیا ءِ زرگزرانی، موسمیاتی بدلی و اسلاموفوبیا کون آ ویل مون تروک ءِ، داسہ کروک آ گام گیج آک ننا آخبت ءِ طے کیرہ۔ اوپارے کہ پاکستان مذاکرات نا کمک اٹ ویل آتا ایسری آ یخین تخک۔ ننے ڈیہہ نا گچینی کن اواری اٹ کاریم کننگ نا گرج ءِ۔ وزیرخارجہ پارے کہ غٹ ملک آتے موسمیاتی بدلی تتون مون تننگ کن ہلہلہ بنداو تیا کاریم کروئی مریک، دنیا ءِ موسمیاتی بدلی نا اثر مون تروک ءِ، 2022 اٹی پاکستان ءِ تاریخ نا بدترین نوکاپ تون مون تروئی تما۔ بلاول بھٹو زرداری پارے کہ ساڑی آ نوکاپ آن پاکستان نا 30 ارب ڈالر نا نسخان مس۔ نوکاپ آن کروڑ آن زیات بندغ آک زہمی مسر، لکھ آ بے اُرا و ہزار آ ایکڑ آ سلوک فصل آک زہمی مسر۔ اوپارے کہ نوکاپ آن زہمی و زرگزران نا بحالی اولیت ءِ، مچ آ دنیا ٹی کاربن نا پیش تمنگ اٹی پاکستان نا بشخ اسہ درسد آن ہم کم ءِ۔
