اسلام آباد۔ 24 جنوری (اے پی پی) بنجائی وزیر جان جوڑی عبدالقادر پٹیل پارینے کہ اینخو اولیکو وار لاہور نا چاگڑدی وڑاٹی دین پک مسنے ہراکہ گڑتی نا سوب ءِ، لاہور اٹی پیدوار مروک آ پولیو دین اوغان صوبہ ننگرہار اٹی مروک آ پولیو دین اتون مماثلت تخک۔ سے شنبےنادے آ وزارت جان جوڑی آن جاری بیان نا رداٹ بنجائی وزیر جان جوڑی عبدالقادر پٹیل پارے کہ لاہور نا چاگڑدی وڑاٹی پولیو دین پک مس ہراکہ گڑتی نا سوب ءِ، پاکستان و اوغانستان پولیو نا برخلاف جنگ اٹی متحد ءُ۔ اوپارے کہ لاہور، گلشن راوی ٹی پیدوار مروک آ پولیو دین تدوک آ سال نومبر اٹی اوغان صوبہ ننگرہار اٹی خننگوک آ پولیو دین تون مماثلت تخک، چاگڑد اٹی دین نا وخت آ پک مننگ چناتے پولیو دین آن معذور مننگ آن بچفنگ کن بھاز المی ءِ۔ لاہور اٹی فروری ومارچ اٹی ودکی پولیو مہم آتا ڈٹ بندی کننگانے۔ پاکستان پولیو پروگرام اوغانستان پولیو پروگرام تون بھاز خڑکی اٹ کاریم کرینے۔ اوپارے کہ دین انا تالانی ءِ توننگ نا اسٹ انگا وڑ پنچ سال اسکان نا چناتے رکھی پڑی کُنفنگ ءِ۔ لمہ و باوہ، خاص وڑاٹ لاہور اٹی، داہیت ءِ پک کیر کہ فروری ٹی اڈ ہلوک آ مہم اٹی تینا چناتے ضرور پولیو نا پُڑی کنفر۔ لاہور آن پولیو نا آخیریکو کیس جولائی 2020 اٹی مون آ بسوسس۔ تدوک آ سال ضلع لاہور نا چار چاگڑدی وڑتیٹی پولیو دین پک مسوسس۔
