دوحہ۔ 24 جنوری (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ پاکستان و قطر انا تاریخی و ایلمی تعلقداری ءِ و ہڑتوم آ ملک آک سائنس، ٹیکنالوجی، کشت وکشار و تعلیم تون اوار چندی بشخ آتیٹی کمکاری ءِ مون آ دننگ کیرہ۔ وزیرخزانہ داہیت ءِ تدوک آدے قطر انا وزیر خزانہ علی بن احمد الکواری تون اوڑدہی ٹی گپ وتران کرسا پارے۔ داوخت آ وزیراعظم نا خصوصی کمکار ڈاکٹر محمد جہانزیب و قطر اٹی پاکستان نا سفیر محمد اعجاز ئسک ہم ساڑی ئسر۔ وزیرخزانہ فٹ بال نا جہانی کپ انا سرسہب ایسری آ قطر ءِ مبارکبادی تس ۔ وزیرخزانہ قطر انا وزیر خزانہ ءِ پاکستان اٹی تدوک آ بشام اٹی مروک آ ترند پِر و بدترین نوکاپ آن مروک آ نسخان تیان ہم معلومدار کرے و اوفتے حکومت نا کنڈان بحالی و پوسکن تفنگ نا سرجزآتا بارواٹی معلومدار کرے۔ اوڑدہی ٹی پاکستان و قطر انا نیام اٹ چندی بشخ آتیٹی کمکاری نا گمان تا جاچ ءِ ہلنگا۔ فریق آک داہیت آ امنا کریر کہ ہڑتوم آ ملک آتا نیام اٹ تاریخی مذہبی و برادرانہ تعلقداری ءِ۔ پاکستان وقطر سائنس، ٹیکنالوجی، کشت وکشار و تعلیم تون اوار چندی بشخ آتیٹی کمکاری ءِ مون آ دننگ کیرہ۔ وزیرخزانہ قطرانا وزیرخزانہ ءِ دورہ ءِ پاکستان نا سلہ ہم خلک۔ داکان بیدس وزیر خزانہ قطر انا کیوٹرمینلز نا ڈل اتون ہم اوڑدہی کرے۔ کیوٹرمینلز نا چیف ایگزیکٹیو آفیسر نوائل باسیت ڈل انا کماشی ءِ کریکہ۔ اوڑدہی ٹی لاجسٹک و بندرگاہ تا آپریشن تا بشخ آتیٹی کمکاری نا گمان تا جاچ ءِ ہلنگا۔ وزیرخزانہ ڈل ءِ پارے کہ پاکستان اٹی کاروبار و زرکاری کن سازگار چاگڑد اس فراوان کننگانے۔ اوپارے کہ چندی بشخ آتیٹی براہ راست درملکی زرکاری نا بھلو گمان اس ساڑی ءِ ہرافتیان پبی فائدہ ہرفنگے۔ وزیرخزانہ پارے کہ حکومت زرگزران نا پائیدار نمو کن گام گیج کننگ اٹی ءِ و دامسخت کن چندی بشخ آتیٹی اصلاحات نا چرجوئی ہم برجاءِ۔
