اسلام آباد۔ 24 جنوری (اے پی پی) بنجائی وزیر توانائی انجینئر خرم دستگیر پارینے کہ ملک اٹی بجلی نا تعطل آن پد غٹ گریڈ اسٹیشن آتے بحال کرینن، بجلی نا فراوانی نظام پورو وڑاٹ رکھوک ءِ، صارف آتیا بھاریم ءِ کم کننگ کن کبین ءُ پلانٹ چلیفپنہ، نوکاپ زہمی علاقہ غاتیٹی درو بجلی ءِ بحال کننگاسس، تربیلا و منگلا نا نیام اٹ ویل اس درپیش مننگ آ تعطل بس، بجلی کارخانہ غاتے چلیفنگ کن وافر ایندھن ساڑی ئسک و ارے، کراچی و چشمہ نا جوہری پلانٹ آتے چلیفنگ کن کاریم برجاءِ۔ داخیال آتا درشانی ءِ او سے شنبےنادے آ داڑے پریس کانفرنس کرسا کرے۔ بنجائی وزیر پارے کہ بجلی بحالی نا بناءِ تدوک آ دے آن ریسہ وار کننگاسس ولے نن آ ہرا علاقہ غاک رہینگاسر ہموڑے ہم پورو وڑاٹ بجلی ءِ بحال کننگانے۔ اوپارے کہ ملک اٹی 1112 گریڈ اسٹیشن ءُ ، دا گریڈ اسٹیشن تیا بجلی پورو وڑاٹ بحال ءِ ، اوفتیان اسہ ہم ہندن ءُ گریڈ اسٹیشن اس اف ہراڑے بجلی بحال مف ۔ بنجائی وزیر انجینئر خرم دستگیر پارے کہ بجلی بحالی آ پاور ڈویژن، وزیر دِیر، چیئرمین واپڈا تون اوار ایلو فتا کمکاری آ اوفتا منت وارا ُن۔ اوپارے کہ تدوک آ دے ملک اٹی بجلی نا بھلو بریک ڈائون اس مس داوخت آ پشاور، اسلام آباد ریجن نا منہ علاقہ غاتیٹی بجلی ئسک، ہندا وڑ سندھ انا نوکاپ زہمی علاقہ غاتیٹی ہم بجلی پورو وڑاٹ بحال ئسک، حکومت بلوچستان نا دےٹکی علاقہ غاتے ہم بجلی فراوان کرین، گڑاس ٹیکنیکل چیلنج مون تروک ئس، قطب و سویل اٹی وولٹیج نا شیف و بڑزی مس۔ بنجائی وزیرپارے کہ پاور پلانٹ ءِ دُوارہ چلیفنگ کن بجلی نا گرج مریک ہراڑکن تربیلا پاور پلانٹ ءِ چلیفسا ایلو پلانٹ آتے بجلی تننگا۔ اوپارے کہ اللہ تعالیٰ نا فضل و کرم اٹ پاور ڈویژن، واپڈا و تربیلا، غازی بروتھاآن پدریسہ مچ آ ملک اٹی سسٹم ءِ آن کننگ نا بناءِ کرینن، اینو سہب انا سوا پنچ بجہ غان مچ آ ملک اٹی بجلی پورو وڑاٹ بحال مسنے۔ انجینئر خرم دستگیر پارے کہ کراچی و چشمہ نا جوہری پلانٹ آتے چلیفنگ کن کاریم برجاءِ ہرافتے چلیفنگ کن 48 گھنٹہ نا وخت درکار ءِ، بروک آ 48 گھنٹہ ٹی ملک اٹی بجلی نا کمتی سلک، پگہ نا ایلو نا دے اسکان پورو وڑاٹ بجلی بحال مریک۔ اوپارے کہ تدوک آ دے ملک اٹی بجلی نا سسٹم اٹی ہرا خرابی مس اوٹی فراوانی نظام پورو وڑاٹ رکھوک مسنے و داٹی ہچ ءُ نسخان اسے نا حوال رسینگتنے۔ اوپارے کہ بجلی ناکارخانہ غاتے چلیفنگ کن بھلو کچ اسےٹی ایندھن ساڑی ئسک و ارے دا بابت غٹ ہوکاک سٹی ءُ۔ اوپارےکہ حکومت مدام صارف آتا بجلی نا بل آتا خیال ءِ تخسا کبین آ پلانٹ آتے کم چلیفے ، مچ آ سال اٹی جنوری نا نن تیٹی بجلی نا طلب کم مریک۔ اوپارے کہ وزیراعظم محمد شہباز شریف تدوک آ دے بجلی نا تعطل نا بابت مسہ باسکی جاست وپاستی کمیٹی اس ٹہیفینن ہرانا کماشی ءِ وزیر مملکت پیٹرولیم ڈاکٹر مصدق ملک کننگ اٹی ءِ، نن ہم اوڑتون پبی کمک کینہ و اوفتے غٹ معلومداری فراوان کینہ۔ اوپارے کہ داہیت انا ہم جاست وپاست مریک انت داٹی پیشن نا نیام تمنگ اس تو اف البتہ انٹرنیٹ آن پیشن نا نیام تمنگ نا گمان آک کم ءُ، تدوک آ دے تیٹی داوڑنا ہراواقعہ غاک مسر او ٹیکنیکل ایشو ئسر۔ اوپارے کہ وارسک پاور سٹیشن آن بجلی نا فراوانی ٹی ننے ریلیف ملا، تربیلا و منگلا نا نیام اٹ گڑاس تکنیکی ویل پیش بس، تکنیکی خرابی ءِ مر کننگ کن کوشست کننگ اٹی اُن۔ بنجائی وزیر پارے کہ تدوک آ حکومت سسٹم اٹی ہچ ء زرکاری اس کتو، تدوک آ چار سال اٹی سسٹم آ چکار کننگتو، مجرمانہ ڈیوالئی کننگا، پوسکن آ گریڈ اسٹیشن تیا تدوک آ حکومت ہچ ءُ کاریم اس کتو۔ داسہ ساڑی حکومت اوڑا بناءِ کرینے۔ اسہ سوج اسے نا ورندی ٹی بنجائی وزیر پارے کہ پاکستان نا انفراسٹرکچر ءِ جوڑ کننگ و خلنگ اٹ مسکوہی وزیراعظم محمد نواز شریف نا بھلو کڑد اسے ، ملک اٹی مدام محمد نواز شریف دور اٹی شونداری مس، ملک اٹی مسلم لیگ (ن) نا 2013 آن 2018 اسکان نا دور حکومت اٹی ملکی شونداری مس۔ اوپارے کہ ملک نواز شریف نا کماشی ٹی شونداری کرے و داسہ وزیراعظم شہباز شریف نا کماشی ٹی اسہ وار ولدا شونداری نا کنڈا ہِننگ ءِ۔ اوپارے کہ گیپکو نا 60 گریڈ اسٹیشن وخت اس کہ حیسکو نا غٹ 71 گریڈ اسٹیشن آتے بحال کرینن ۔
