اسلام آباد۔ 24 جنوری (اے پی پی) بنجائی وزیر صنعت و پیدوار مخدوم مرتضیٰ محمود پارینے کہ سی پیک فیز ٹو اکن موبائل انڈسٹری گچین ءِ، ننے ایکسپورٹ کن سیاسی سوگوی و پالیسی تا چرجوئی نا گرج ءِ۔ داخیال آتا درشانی ءِ او سے شنبےنادے آ وزارت صنعت و پیدوار و موبائل مینو فیکچرنگ ایسوسی ایشن نا کمک اٹ اڈ ہلوک آ سمٹ آن تران کرسا کرے۔ بنجائی وزیر پارے کہ مشکل وخت ضرور ارے ملک آ ولے دانا زمواری غٹ آ عائد مریک ، سیاستدان ، نجی بشخ غٹ انا زمواری ءِ کہ او کاریم کیر، موبائل مینوفیکچرنگ نا پوسکن آ صنعت ئس اوفتے مشکل مون تروک مس۔ اوپارے کہ ننے تینا مشکل آتیان ہیل کروئی مریک ہراڑان نن بھاز گڑا دوئی کننگ کینہ، دا صنعت ءِ گچین کرسا نن تینا ملکی گرج آتے پورو کننگ کینہ، موبائل مینو فیکچرنگ انڈسٹری ءِ ترندی اٹ ہندی پیدوار نا کنڈا بروئی مریک، روپئی نا قدر اٹی کمتی آن ننا لیبر نا خڑچ اٹی کمتی بسنے، موبائل مینوفیکچرنگ ءِ ودفسا نن برآمد آتیٹی ودکی کننگ کینہ۔ اوپارے کہ پاکستان گونڈ مد اکن داحالیت آتیان پیش تمک ولے ننے مریس مدپالیسی اس جوڑ کروئی مریک۔ داوخت آ سیکرٹری وزارت صنعت وپیدوار امداد اللہ بوسال پارے کہ 2020 اٹی پیدوار ءِ ودفنگ کن اسہ پالیسی اس جوڑ کننگاسس۔ سینئر جی ایم پالیسی انجینئرنگ ڈویلپمنٹ بورڈ عاصم ایاز پارے کہ موبائل فون انڈسٹری کن دوستانہ پالیسی تننگا، پاکستان اٹی موبائل نا ہندی پیدوار پدریسہ ودنگ ءِ، پاکستان اٹی اسہ کمپنی سے آن بیدس غٹ بھلا برانڈ نا موبائل جوڑ کننگک، پاکستان اٹی موبائل مینوفیکچرنگ نا ہندی صنعت اٹی 2.6 ارب ڈالر نا زرکاری کننگانے ، وائس پریزیڈنٹ موبائل مینو فیکچرنگ ایسوسی ایشن عامر اللہ والا پارے کہ نن موبائل فون نا تینا 95 درسد ڈیمانڈ ءِ پورو کننگ اُن، نن گچین موبائل اسمبلر اُن، 40 ہزار روزگار نا وارخواہی تسن، 31 مینو فیکچرنگ پلانٹ پاکستان اٹی کاریم کننگ ءُ، ویت نام نا موبائل ایکسپورٹ 57 ارب ڈالر ءِ، ایلو ملک آتا موبائل ایکسپورٹ ڈبل مننگ ءِ، مخلوق موبائل انڈسٹری ٹی انویسٹ کننگ خواہک ولے اوفتے پالیسی تا چرجوئی درکار ءِ، چائنیز انڈسٹری لوکل پارٹس مینو فیکچرنگ کن پاکستان آ بننگ کن تیار ء،، سی پیک فیز ٹو اکن موبائل انڈسٹری گچین ءِ، ننے ایکسپورٹ کن سیاسی سوگوی و پالیسی تا چرجوئی نا گرج ءِ۔
