اسلام آباد۔ 24 جنوری (اے پی پی) نیشنل ڈیزاسٹر مینجمنٹ اتھارٹی و جہانی بینک پاکستان ءِ موسمیاتی بدلی تا منفی اثرآتیان رکھ کننگ کن تین پہ تینی کمکاری نا فریم ورک اس تیار کننگ کن ورکنگ گروپ اس جوڑ کننگ آ امنا کرینو۔ نیشنل ڈیزاسٹر مینجمنٹ اتھارٹی نا چیئرمین لیفٹیننٹ جنرل انعام حیدر ملک تون ورلڈ بینک انا ٹیم انا سے شنبےنادے آ داڑے اوڑدہی ٹی ساڑی آ نوکاپ نا رداٹ ڈیزاسٹر مینجمنٹ سسٹم نا چندی بشخ و آفت آتا خطرہ غاتا گواچی ڈیہہ تا رکھ و اوفتا توننگ کن گچین حکمت عملی آ گپ وتران کریر۔ چیئرمین این ڈی ایم اے آرٹیفیشل انٹیلی جنس آ تالان نیشنل ایمرجنسیز آپریشنز سینٹر ءِ این ڈی ایم اے نا اسہ اہم فورم اسے نا وڑاٹ فعال کننگ نا عزم انا درشانی ءِ کریر ہرانا کمک اٹ آفت آتا وخت آن مست آگاہی، انتباہی نظام و رکھی گام گیج آتا بابت اہم معلومداری دوئی کننگ و تعلقدار ادارہ و الس اٹ آگاہی، تیاری و پیشگی رسپانس تون اوار اوار فرضی مشق آتیکن کمک رسینگک۔ چیئرمین این ڈی ایم اے ٹیم ءِ معلومدار کرے کہ نیشنل انسٹی ٹیوٹ آف ڈیزاسٹر مینجمنٹ (این آئی ڈی ایم) ءِ ہلہلہ ئی حالیت آتا بابت اسہ قومی تھنک ٹینک اسے نا وڑاٹ ٹہیفنگ اُن ہرانا رداٹ قومی یونیورسٹی و جہانی تنظیم تا کمک اٹ موسمیاتی بدلی و قدرتی آفت آتا خطرہ غاتا رداٹ پٹ وپول و مطالعہ کن اسہ پلیٹ فارم اس ہم جوڑ کننگک ۔ پاکستان اٹی او ہلہلہ ئی حالیت آتون مون تننگ نا بشخ اتون گنڈوک بندغ و منشاکار آتیکن ہیلکاری پروگرام تا اڈتننگ تون اوار اوار اوفتا ڈیٹا بیس نا خیال داری آ زور شاغا تانکہ ہلہلہ ئی حالیت آتیٹی اوفتا خذمت آتے پک کے۔ اوڑدہی ٹی پاکستان ءِ موسمیاتی بدلی تا منفی اثرآتیان رکھ کننگ کن تین پہ تینی کمکاری نا فریم ورک اس تیار کننگ کن این ڈی ایم اے و ورلڈ بینک انا اسہ ورکنگ گروپ اس جوڑ کننگ آ امنا کننگا۔
