اسلام آباد۔ 23 جنوری (اے پی پی) صدر مملکت ڈاکٹر عارف علوی سویڈن اٹی قرآن پاک نا بے حرمتی نا مذمت و اسلاموفوبیا نا برخلاف اجتماعی عزم انا خواست ءِ کرسا پارینے کہ آجوئی سلاہ درشانی نا آڑاٹ اسلام نا مقدس کتاب نا توہین آن ارب آ مسلمان تا جوزہ غاتے ٹھیس تننگانے۔ دوشنبےنادے آ داڑے ایوان صدر نا پریس ونگ آن جاری بیان نا رداٹ صدر مملکت پارے کہ قرآن نا توہین نا عمل آمخی، خارتس و اسلاموفوبک ءِ، دا غیر اخلاقی وعاقعہ بے سوب اشتعال انگیزی و دنیا نا مسلمان تا جوزہ غاتے مجروح کننگ نا عمل اسے۔ اوپارے کہ دا قابل مذمت عمل جہانی کہول آ تسلیم شدہ اصول و آجوئی سلاہ درشانی نا روا درشانی نا اصول آتیان چپ ءِ۔ صدر مملکت پارے کہ آجوئی سلاہ درشانی خارتس تقریر و مخلوق ءِ بیدادی آ ہشکا تننگ نا موکل تفک، اسلام دنیا نا غٹ مذہب آتیکن عزت و شرف نا تلقین کیک۔ ڈاکٹر عارف علوی پارے کہ داگندہ انگا کاریم مسلمان تے اوفتا مقدس قدر انا توہین ءِ کرسا ڈکھیائی کننگانے، دا عمل دنیا ٹی اسلاموفوبیا نا خطرناک کہول ءِ پاش کیک۔ صدر مملکت پارے کہ جہانی برادری اسلاموفوبیا نا برخلاف اسیجائی عزم انا درشانی ءِ کے۔ اورواداری و بقائے تین پہ تینی قدر ءِ سوگو کننگ کن جہانی کوشست آتا گرج آ زور شاغسا پارے کہ خار انا نظریہ ءِ مون آ دروک آ و انتہاپسند و بنداو پرست زموار آتے خار تالان کننگ نا بایدے موکل تفننگپ۔
