اسلام آباد۔ 19 جنوری (اے پی پی ) دفترخارجہ نا ترجمان ممتاز زہرا بلوچ بھارت نا غیرکانودی کوزہ ٹی جموں وکشمیر اٹی انسانی حق انا بھلا لتاڑتیا گڑتی نا درشانی ءِ کرسا پارینے کہ پاکستان بھارت نا غیرکانودی کوزہ ٹی جموں وکشمیر اٹی انسانی حق انا پدریسہ بھلا خلاف ورزی تیا توار بڑز کرسا کیک ۔ پنچ شنبےنادے آ داڑے ہفتہ وار پریس حوال اٹی اوپارے کہ بھارت نا غیرکانودی کوزہ ٹی جموں وکشمیر اٹی بھارتی فوج انا کنڈان ظلم و ستم برجاءِ۔ اوپارے کہ بھارتی کوزہ گیرفوج اِرا کشمیری ورناتے ضلع بڈگام اٹی اسہ جعلی ءُ مقابلہ سے ٹی گاڈی آن دڑفسا سم اٹ خلسا شہید کرے وخت اس کہ اسہ 75 سال انا زیر حراست بندی محمد مقبول خان نا کپواڑہ زندان اٹی بیدادی نا سوب آن مرک واقع مس۔ ترجمان پارے کہ اودے و اونا ہر مسٹ آ مارتے تدوک آ سال اگست اٹی فرضی دوبہ غاتا رداٹ دزگیر کننگاسس، کپواڑہ نا کنن خلق اٹی اسہ خاہوت اس تدوک آ اسہ تُو آن تینا مار و ایلم عبدالرشید ڈار ءِ پٹنگ اٹی ءُ ہرافتے بھارتی فوج انا راشٹریہ رائفلز نا کارندہ غاک 15 دسمبرآ دزگیر کریسر۔ ترجمان پارے کہ تدوک آ مسہ دہائی ٹی بھارت نا غیرکانودی کوزہ ٹی جموں وکشمیر اٹی سد آ بندغ بھارتی سیکورٹی فورس آتا تحویل اٹی بے گوا مسنو۔ اوپارے کہ معتبر حساب وکتاب نارداٹ 1989 آن داتم اسکان مقبوضہ علاقہ ٹی کم و ود ہشت ہزار بندغ بے گوا مسنو، پاکستان بھارت نا غیرکانودی کوزہ ٹی جموں وکشمیر اٹی انسانی حق انا پدریسہ خلاف ورزی تیا توار بڑز کرسا کیک۔ دفترخارجہ نا ترجمان پارے کہ پاکستان اقوام متحدہ نا سلامتی کونسل نا تعلقدار قراردادآتا رداٹ حق خودارادیت نا دوئی کننگ کن جموں وکشمیر نا الس نا اخلاقی ، سیاسی و سفارتی مخ تفی ءِ برجاتخک۔ ترجمان پارے کہ وزیرخارجہ بلاول بھٹو زرداری جہانی اقتصادی فورم نا دیوان اٹی بشخ ہلنگ کن ڈیووس اٹی ءِ، وزیرخارجہ بلاول بھٹو زرداری نا کانگو نا صدر و ایلو ملک آتا راہشون تتون اوڑدہی مسنے۔ ترجمان پارے کہ فورم نا وخت آ وزیرخارجہ بلاول بھٹو زرداری جمہوریہ کانگو نا صدر آن بیدس چین نا نائب وزیر اعظم لیوہی آن بیدس سپین، سعودی عرب، بیلجیم ، فن لینڈ و ہالینڈ نا وزیر خارجہ غاتون اوڑدہی کرے۔ دااوڑدہی تیٹی تین پہ تینی است خواہی نا ہڑتوم آ کنڈآتا و جہانی امور آ گپ وتران کننگا۔ ترجمان پارے کہ وزیر خارجہ کارپوریٹ ایگزیکٹیوز ، جہانی ادارہ غاتا سروک و میڈیا و سول سوسائٹی نا سرکڑدہ شخصیت آتون ہم گپ وتران کرے۔
