اسلام آباد۔ 16 جنوری (اے پی پی) وزیراعظم محمد شہباز شریف سپریم کورٹ بار ایسوسی ایشن نا مسکوہی صدر عدالطیف آفریدی نا خون نا ترندی اٹ مذمت ءِ کرسا پارینے کہ لالہ عبدالطیف آفریدی نا خون آ بھاز ڈکھیااُن۔ اومچ آ وئی آئین نا سربلندی، جمہوریت ، کانود نا حکمرانی و انسانی حق اکن جہد کرے۔ دوشنبےنادے آ تینا بیان اٹی وزیراعظم محمد شہباز شریف پارے کہ خیبرپختونخوا ٹی امن و ایمنی نا بگڑینگوک آ حالیت آتے تشویشناک گوندسا خیبرپختونخوا نا حکومت آ زور شاغا کہ او دہشت گرد آتے کانود نا رداٹ عبرتناک سزا ترفے۔ وزیراعظم عبدالطیف آفریدی نا خذمت آتے خراج عقیدت پیش کرسا پارے کہ او اسہ بڑزکو کانود دان و نرزور ءُ سیاسی راہشون اس ئسک،مادر ملت گودی فاطمہ جناح نا مخ تفی آ اودے یونیورسٹی آن کشنگاسس، او حق انا ہیت ءِ مدام کریکہ و و نتیجہ غاتاپرواہ ءِ کتوکہ۔ وزیراعظم داہیت آ است ہسونی نا درشانی ءِ کرے کہ اینو آئین، جمہوریت وکانود نا حکمرانی نا اسہ سوگو ءُ توار اس چُپ مس۔ وزیراعظم پارے کہ لالہ عبدالطیف آفریدی نا سیاسی، کانودی و جمہوری جہد برجاسلک۔ اودعاکرے کہ اللہ تعالیٰ ایماندار ءِ جنت الفردوس اٹ جاگہ ایتے۔ داکان بیدس وزیراعظم تینا ٹویٹ اٹی عبدالطیف آفریدی نا درجہ غاتا بڑزی و خاہوت کن صبر و جمیل نا دعاہم کرے۔
