راولپنڈی۔ 16 جنوری (اے پی پی) اینٹی نارکوٹکس فورس منشیات تور آپریشن تیٹی منشیات دوئی کرسا دوبہ دار آتے دزگیر کرے۔ ترجمان نا رداٹ دوشنبےنادے آ اسلام آباد انٹرنیشنل بالی پٹ آ شارجہ غا ہنوک آ دوبہ دار نا پڈآن 47 کیپسول ہیرون آن پُر دوئی کرسا چارسدہ نا ہنکینی دوبہ داراسے دزگیر کننگا۔ اے این ایف و اے ایس ایف نا اسلام آباد انٹرنیشنل بالی پٹ آ اسیجائی کارروائی ٹی فلائٹ نمبر کے اے۔ 4506 آن بشکیک آ ہنوک آ دوبہ دار آن 62 گرام چرس دوئی کننگا، دوئی مروک چرس آتے سوہن حلوہ نا ڈبہ ٹی اودیم کننگاسس۔ داوخت آ ہری پور نا ہنکینی دوبہ دار اسے دزگیر کننگا، سی ایم ایچ چوک اٹک نا خڑک آ کارروائی کرسا کار اسے آن 7 کلو 200 گرام چرس دوئی کرسا 2 دوبہ دار آتے دزگیر کننگا۔ داکان بیدس پشاور آن ٹیکسلا منشیات اسمگلنگ نا کوشست ءِ بے سہب کننگا۔ موٹروے پارک پشاور نا خڑک آ کارروائی کرسا 6 کلو چرس دوئی کرسا راولپنڈی نا ہنکینی دوبہ دار اسے دزگیر کننگا۔ اے این ایف و ایف سی نا خیبر اٹی اسیجائی کارروائی ٹی پلاسٹک نا تھیلہ غاتیان 23 کلو 500 گرام چرس دوئی کننگا۔ لاہور گلبرگ 3 اٹی واقع نجی کوریئر آفس اٹی برطانیہ غا گدریفوک آ پارسل آن 295 گرام ہیرون دوئی کننگا۔ دوئی مروک منشیات آتے پچ آتیٹی اودیم کننگاسس۔ ترجمان اے این ایف پارے کہ دوبہ دار آتا برخلاف منشیات تور ایکٹ نا رداٹ مقدمہ درج کرسا جاست وپاست نا بناءِ کننگانے۔
