اقوام متحدہ۔ 13 جنوری (اے پی پی) پاکستان پدتموک ملک آتا تنظیم جی۔ 77 و چین نا چیئرمین شپ ءِ باضابطہ وڑاٹ کیوبا نا حوالہ کرے۔ 134 باسکی ٹولی نا چیئرمین شپ نا گدریفنگ نا ٹرسٹی شپ کونسل اٹی اڈ ہلوک آ دود آن وزیر خارجہ پاکستان بلاول بھٹو زرداری ویڈیو تران کرے۔ اوپارے کہ او ٹولی نا چیئرمین شپ ءِ کیوبا نا ہم منصب و تینا سنگت برونوروڈریگوئیز پارلاءِ گدریفنگ نا گمر محسوس کننگ اٹیءِ۔ اوپارے کہ پاکستان نا سرکڑدہ ئی ٹی پدتموک ملک آتا ہندا بڑزکو چیلنج آتون مون تننگ نا اجتماعی عزم و سیوت آ تالان کوشست آتا مثبت بھرم مون آ بننگ ءِ۔ وزیرخارجہ نا تران آن پد اقوام متحدہ ٹی پاکستان نا آخبتی مندوب منیر اکرم ٹولی نا “گریول” کیوبا نا وزیرخارجہ نا حوالہ کرے۔ ٹولی نا پوسکن آ چیئرمین تینا تران اٹی 2022 اٹی ٹولی نا شاندار سرکڑدہ ئی آ پاکستان نا کوشست آتا ستاءِ کرے۔ پاکستان دا ٹولی نا بانی باسک آتیٹی اوار ءِ و دا ٹولی نا چیئرمین شپ 14 جنوری 2022 آ سنبھالاسس۔ پاکستان نا چیئرمین شپ نا مد اٹی ٹولی شونداری ءِ اقوام متحدہ نا ایجنڈا ٹی مرکزی اہمیت ترفے و پدتموک ملک آتا کوویڈ۔ 19 نا جہانی دین، چاگڑدی بدلی تا ودوک آ منفی اثر، اقتصادی بے بریبری، وام تا تنکی، کبینی ، غذائی بے رکھی و جھیڑہ کون آ چیلنج آتون مون تننگ اٹ اہم ءُ کڑد اس ادا کرے۔ تینا تران اٹی وزیرخارجہ بلاول بھٹو زرداری پارے کہ پاکستان داکان مست 3 وار ٹولی نا کماشی ءِ کرینے۔ اومستی پارے کہ پاکستان نا کماشی ٹی ٹولی ہندا بڑزکو چیلنج آتون مون تننگ کن کیہی اہم معاہدہ و منظم ردعمل ءِ گڈیکو دروشم اس تننگ اٹ سرسہبی دوئی کرے۔ دافتے ٹی فنانسنگ فار ڈویلپمنٹ فورم اٹی پائیدار شونداری نا ہدف آتا دوئی کننگ نا معاہدہ، ہائی لیول پولیٹکل فورم اٹی پائیدار شونداری ہدف آتا دوئی کننگ نا وڑوڈول آتیا شرہ، اقوام متحدہ نا جنرل اسمبلی نا 77 می دیوان اٹی بھلا اقتصادی، شونداری و چاگڑدی امور آ امنائی سلاہ، کوپ۔ 27 اٹی لاس اینڈ ڈیمیج فنڈ انا جوڑ کننگ نا تاریخی فیصلہ و تدوک آ تُو ٹولی نا وزارتی کانفرنس اٹی غذائی ، ایندھن و مالیاتی تنکی تا اثرآتے کم کننگ کن دمدستی و پنجر جاتی گام گیج آتیا اسہ موقف اسے آ امنائی سلاہ نا دوئی کننگ خاص وڑاٹ قابل ذکر ءِ، ہرافتیان پائیدار شونداری ہدف 2030 و چاگڑدی رکھ اکن پیرس معاہدہ غا پیش رفت اٹی کمک رسینگانے۔ دا گام گیج آک داہیت انا شاہدی ءُ کہ سیوت و اجتماعی کوشست آتیان نن شونداری و شونہالی نا بابت مون تروک چیلنج آتا مون ءِ توننگ کن درکار فیصلہ کننگ کینہ۔ اوپارے کہ دا مسخت آتا دوئی کننگ کن ٹولی نا باسک آتے باہم سیوت، تعامل و اجتماعی کوشست آتے برجاتخوئی مریک تانکہ پائیدار شونداری ہدف آتیا اینخو مروک آ سروکی دیوان و کوپ۔ 28 اٹی پین سرسہبی دوئی کننگ مرے۔ دا چرجوئی ٹی ٹولی نا مالی مشکل آتا گواچی 60 باسک ملک آتا وام تیٹی ریلیف و ری اسٹرکچرنگ ، اسہ سد آن زیات پدتموک ملک آتے درکار مالیاتی رعایت و لیکویڈٹی نا فراوانی کن غیر استعمال شدہ ایس ڈی ٓرز نا ری چینلنگ، بین نا گواچی 25 کروڑ بندغ آتے خور انا فراوانی، چاگڑدی بدلی تا خطرہ غاتا گواچی ملک آتا کمک و قدرتی آفت آتیان بھسکاری آں پد اوفتا پوسکن تفنگ اٹ کمکاری خاص وڑاٹ قابل ذکر ءُ۔ وزیرخارجہ بلاول بھٹو زرداری داپت انا درشانی ءِ کرے کہ ٹولی۔ 11 نا باسک ملک آک ہندا بڑزکو چیلنج آتون سرسہبی اٹ مون ترسا اسہ زیات بریبری و انصاف آ تالان جہانی اقتصادی نظام ءِ مون آ دننگ اٹ اہم ءُ کڑد اس ادا کننگ کیرہ۔ اوپارے کہ ننا تین پہ تینی سیوت ہی ننا غٹ آن بھلا میرات ءِ وکوپ۔ 27 اٹی اونا پبی درشانی ءِ کننگا۔ اودااومیت نا درشانی ءِ ہم کرے کہ کیوبا نا کماشی ٹی ٹولی مون تروک چیلنج آتون جیرت مندانہ وڑاٹ پبی وڑاٹ مون تننگ اٹ سرسہب مریک ہراڑان پائیدار شونداری و چاگڑدی بدلی تا منفی اثرآتے کم کننگ نا ہدف آتا دوئی کننگ اٹ کمک رسینگک۔ اوپارے کہ پاکستان گروپ نا باسک انا حیثیت اٹ دا مسخت آتا دوئی کننگ اٹ تینا پبی کڑد ءِ برجاتخک۔
