ابوظہبی۔13جنوری (اے پی پی):پاکستان ءُ متحدہ عرب امارات ءَ کلتی شوبگ آنی تہ ءَ مھکمیں ءُ بزانتی دونیمگی یکوئی آناں دیمروئی دیگ، سٹریٹیجک شریکداری ءُ کمک آناں مھکم جوڑ کنگ ءِ واستہ شور ءُ مشور ءُ کمک آناں ترند کنگ ءِ گوما انفارمیشن ءُ کمیونیکیشن ٹیکنالوجی ءِ شوبگ ءَ ڈیجیٹل بھر ءُ بانگ ءَ را ھلاس کنگ ءِ واستہ یکجائی ءَ کار کنگ ءِ ھوالگ ءَ تپاک کت۔ مزن وزیر محمد شہباز شریف ءِ ابوظہبی ءِ دو روچی تر ءُ تاب ءَ پد آدینگ ءِ روچ ءَ پاکستان ءُ متحدہ عرب امارات ءِ یکجائی جار ءَ دوئیں ملک آناں وتی تاریخی ءُ براتی ءُ یکوئی آناں درشان کت ایشی ءِ بن روتگ یکجائی نیک راھ، دود ءُ ربیدگ ءُ دمگی ءُ میاں اوستمانی ءُ سلامتی ءِ درشان ءَ انت۔ پاکستان ءُ متحدہ عرب امارات ءَ جار ءَ یکجائی جتا جتائیں دمگی کار آنی سر ءَ ھمگونگیں ھیال ریچی ءِ درشان کت۔ مزن وزیر محمد شہباز شریف ءَ 12 ءُ 13 جنوری ءَ را متحدہ عرب امارات ءِ صدر شیخ محمد بن زید النہیان ءِ دعوت ءِ پد ءَ متحدہ عرب امارات ءِ سرکاری تر ءُ تاب کت، مزن وزیر ءِ سیٹ ءِ گرگ ءَ پد مزن وزیر ءَ یو اے ای ءِ اے سیمی تر ءُ تاب بوتگ۔ مزن وزیر محمد شہباز شریف ءَ شیخ محمد بن زید النہیان ءَ گوں دو نیمگی گند ءُ نند کت۔ مزن ویزر ءَ را صدارتی محل ءَ گارڈ آف آنر پیش کنگ بوت۔ گند ءُ نند ءَ دوئیں سروک آں دو نیمگی یکوئی آناں مھکم جوڑ کنگ ءِ واستہ گامگیج آنی سر ءَ ھیال ریچی کت وھدیکہ دمگی سیاسی ءُ سلامتی کار آنی سر ءَ ھیال ریچی کنگ بوت۔ آئی ءَ سیاسی ، دیمپانی ، اقتصادی ، تجارتی ءُ دو د ءُ ربیدگی شوبگ آنی تہ ءَ کمک آناں ودینگ ، یکجائی منصوبگ آناں دیمروئی دیگ ءُ بنی آدمی آسراتی ءِ شوبگ ءَ کمک آناں مھکم جوڑ کنگ ءِ واستہ ھاسیں گامگیج آنی سر ءَ ھیال ریچی کت۔ مزن وزیر ءَ پاکستان ءَ استیں سیلاپ ءِ ساھت ءَ ھاسیں رنگ ءَ ایشی ءِ مول ءُ مراد آنی ھاترا جوڑ کتگیں ”ایئر برج“ ءِ وسیلگ ءَ متحدہ عرب امارات ءِ مزن جگری کمک کنگ ءِ پد ءَ شیخ محمد بن زید النہیان ءِ شگر ءُ منت واری کت۔ دوئیں پریک آں بنی آدمی اسمگلنگ ءَ گوں گر ءُ چیل، مالومداری آنی برگ ءُ آرگ ءُ دوئیں ملک آنی سفارتی اکیڈمی آنی نیام ءَ وت مہ وتی یاتگیر آنی سر ءَ دست چنگل جت۔ مزن وزیر محمد شہباز شریف ءَ شیخ محمد بن زید النہیان ءَ را پاکستان ءِ تر ءُ تاب ءِ دعوت دات ایش یو اے ای ءِ سروک آں قبول کت۔
