ابوظہبی۔ 13 جنوری (اے پی پی) وزیراعظم محمد شہباز شریف پارینے کہ کسبکار افرادی قوت ءِ متحدہ عرب امارات آ گدریفنگ حکومت نا اولیت آتیٹی اوار ءِ، پاکستان و متحدہ عرب امارات نا نیام اٹ ہڑتوم آ کنڈآتا واپار اٹی نمان ودکی ستاکڑزک، ابوظہبی چیمبر آف کامرس نا بورڈ اٹی پاکستانی پوریاگر نا بطور باسک ساڑی گری متحدہ عرب امارات نا شونداری ٹی پاکستانی کمیونٹی نا اہم کڑد انا امنائی ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون ابوظہبی چیمبر آف کامرس نا ڈل اوڑدہی کرے ہرانا کماشی ءِ چیمبر نا چیئرمین عبداللہ محمد المزروعی کریکہ۔ داوخت آ وزیرخزانہ اسحاق ڈار، وزیر واپار نوید قمر، وزیر دفاع خواجہ محمد آصف، وزیر ہوابازی خواجہ سعد رفیق، وزیر مواصلات مولانا اسعد محمود، وزیراعظم نا خصوصی کمکار اورنگزیب، طارق فاطمی و بڑزکو کمامدارآک ہم ساڑی ئسر۔ ڈل اتون گپ وتران کرسا وزیراعظم پارے کہ اودے یواے ای نا اسہ ءُ چیمبر آف کامرس نا ڈل اسے تون ملسا خوشی مس۔ اوپارے کہ ابوظہبی چیمبر متحدہ عرب امارات نا اقتصادی شونداری ٹی اہم کڑد اس ادا کرینے۔ وزیراعظم پارے کہ چیمبر اٹی پاکستانی باسک آتیان اسہ پوریاگر اسے نا بورڈ ممبر مننگ ننکن گمر نا ہیت اسے ہرا دا حقیقت نا درشانیءِ کہ پاکستانی کمیونٹی متحدہ عرب امارات نا شونداری ٹی اہم ءُ کڑد اس ادا کننگ ءُ۔وزیراعظم پارے کہ متحدہ عرب امارات نا سرکڑدہ غاتا وژن و پامداری چنکووخت اسے ٹی متحدہ عرب امارات ءِ اقتصادی و سیل و سوات نا مرکز جوڑ کرینے، پاکستان متحدہ عرب امارات تون تینا تعلقداری تے اہمیت ایتک ہرااسیجائی عقیدہ، اسیجائی تاریخ و الس تون الس نا کہول آ رابطہ غاتیا تالان ءِ۔ اوپارے کہ نن متحدہ عرب امارات ءِ تینا ہمسایہ مننگ نا ناطہ اسہ اہم ءُ سٹریٹجک و اقتصادی شریدار اس تکنہ ہرا ڈیہہ ٹی امن، سوگوی و اقتصادی شونداری ءِ پک کننگ اٹ اہم کڑد ادا کننگ ءِ و اسیجائی راجی و اقتصادی شونداری نا لائخی تخک۔ وزیراعظم پارے کہ اودے دا خوشی مسنے کہ ساڑی آ دے تیٹی پاکستان و متحدہ عرب امارات نا نیام اٹ ہڑتوم آ کنڈآتا واپار اٹی نمان ودکی مسنے۔ وزیراعظم پارے کہ ہڑتوم آ ملک آتا چیمبرآتا نیام اٹ کمکاری ءِ ودفنگ نا گرج ءِ و نن پاکستانی چیمبرز آ زور شاغنہ کہ او ابوظہبی چیمبر تون پوسکن رابطہ استوار کے۔ وزیراعظم ابوظہبی چیمبر نا باسک آتا است بڈی ءِ کرسا پارے کہ او تینا کاروبار ءِ ودفنگ نا گچین وارخواہی تا آزموندہ ءِ کننگ کن پاکستان نا دورہ ءِ کیر۔ وزیراعظم پارے کہ کسبکار افرادی قوت ءِ متحدہ عرب امارات آ گدریفنگ اونا حکومت نا اولیت آتیٹی اوار ءِ۔ ابوظہبی چیمبرآف کامرس نا باسک آک پاکستان اٹی کاروبار کننگ و زرکاری ٹی است خواہی ظاہر کریر۔
