ابوظہبی۔ 13 جنوری (اے پی پی) پاکستان و متحدہ عرب امارات اہم آ بشخ آتیٹی پبی و بامعنی ہڑتوم آ کنڈآتا کمکاری ءِ مون آ دننگ، سٹریٹجک شریداری و کمکاری ءِ سوگو کننگ کن سلابت و کمکاری ءِ ترند کننگ تون اوار اوار انفارمیشن و کمیونیکیشن ٹیکنالوجی نا بشخ و ڈیجیٹل تقسیم ءِ چٹفنگ کن اواری اٹ کاریم کننگ آ امنا کرینو۔ وزیراعظم محمد شہباز شریف نا ابوظہبی نا اِرادے ئی دورہ غان پد جمعہ نادے آ پاکستان و متحدہ عرب امارات نا اسیجائی اعلامیہ ٹی ہڑتوم آ ملک آک تینا تاریخی و ایلمی تعلقداری تا درشانی ءِ کریر ہرافتا روتہ غاک اسیجائی مذہب، دودوربیدگ، قدر و علاقائی و جہانی امن و سلامتی نا دوئی کننگ اٹی ءُ۔ پاکستان و متحدہ عرب امارات اعلامیہ ٹی چندی علاقائی و جہانی امور آ خیال آتا اسہ وڑمننگ آ است جمی نا درشانی ءِ کریر۔ اعلامییہ نا رداٹ ہڑتوم آ ملک آک تینا دہائی تیا متکن ایلمی تعلقداری تا بنداو آ تینا وتواجہی و علاقائی سالمیت نا رکھ انا کوشست آتیٹی اسہ ایلو تون یکجہتی نا درشانیءِ کریر، ہڑتوم آ ملک آک اہم بشخ آتیٹی پبی و بامعنی ہڑتوم آ کنڈآتا کمکاری ءِ مون آ دننگ نا مسخت اتون تینا اسٹریٹجک شریداری ءِ سوگو کننگ کن سلابت و کمکاری ءِ ترند کننگ آ ہم امنا کریر۔ فریق آک انسانی اسمگلنگ تون مون تننگ، معلومداری تا ہل و تس و ہڑتو م آ ملک آتا سفارتی اکیڈمی تا نیام اٹ مفاہمت نا یات داشت آتیا ہم دستخط کریر۔ وزیراعظم محمد شہباز شریف 12 و 13 جنوری آ متحدہ عرب امارات نا صدر شیخ محمد بن زید النہیان نا سلہ غا متحدہ عرب امارات نا سرکاری دورہ ءِ کرے، وزارت عظمیٰ نا منصب ءِ سنبھالنگ آن پد وزیراعظم نا یواے ای نا دا مسٹ میکو دورہ ئسک۔ وزیراعظم محمد شہباز شریف شیخ محمد بن زید النہیان تون ہڑتوم آ کنڈآتا اوڑدہی کرے، وزیراعظم ءِ صدارتی ماڑی ٹی گارڈآف آنر پیش کننگا، اوڑدہی ٹی ہڑتوم آ راہشونک ہڑتوم آ کنڈآتا تعلقداری تے سوگو کننگ کن پبی گام گیج آتیا سرجمی اٹ گپ وتران کریر وخت اس کہ علاقائی سیاسی و سلامتی نا امور آ ہم گپ وتران کریر۔ او سیاسی، دفاعی ، اقتصادی ، واپاری و دودوربیدگی بشخ آتیٹی کمکاری ءِ ودفنگ، اسیجائی ڈٹ آتے مون آ دننگ و انسانی وسیلہ غاتا بشخ اٹی کمکاری ءِ سوگو کننگ کن مخصوص گام تیا ہم گپ وتران کریر۔ وزیراعظم پاکستان اٹی ساڑی آ نوکاپ اٹی خاص وڑاٹ دا مسخت کن جوڑ کروک آ ’’ایئر برج‘‘ نا کمک اٹ متحدہ عرب امارات نا است بھلنی اٹ کمک آ شیخ محمد بن زید النہیان نا منت واری ءِ ہرفے۔ ہڑتوم آ فریق آک انسانی اسمگلنگ تون مون تننگ، معلومداری تا ہل و تس و ہڑتوم آ ملک آتا سفارتی اکیڈمی تا نیام اٹ مفاہمت نا یات داشت آتیا دستخط کریر۔ وزیراعظم محمد شہباز شریف شیخ محمد بن زید النہیان ءِ پاکستان نا دورہ نا سلہ خلک ہرادے یواے ای نا سرکڑدہ قبول کرے۔
