جنیوا کانفرنس اٹی جہانی ملک و شریدار آک پاکستان  آ پت انا درشانی ءِ کریر، بنجائی وزیرسینیٹر شیری رحمان

اسلام آباد۔ 12 جنوری (اے پی پی) بنجائی وزیر چاگڑدی بدلی سینیٹر شیری رحمان پارینے کہ جنیوا کانفرنس اٹی جہانی ملک و شریدار آک پاکستان آ پت انا درشانی ءِ کریر، نوکاپ زہمی تا بحالی و پوسکن تفنگ کن جہانی ملک و مالیاتی ادارہ غاتا کنڈآن کمک آ تحریک انصاف نا ہرزہ سرائی است ہسونی نا سوب ءِ ۔ پنچ شنبےنادے آ تینا ٹویٹ آتیٹی بنجائی وزیر پارے کہ عمران خان و تحریک انصاف نا راہشون تا بیان تیان پاش مریک کہ اوفتے جنیوا کانفرنس اٹی پاکستان نا سرسہبی آ است ہسونی مسنے، عمران خان دعویٰ کریسس کہ حکومت جنیوا غان دُوخورک پدی بریک، جنیوا کانفرنس اٹی جہانی ملک و ادارہ غاک عمران خان نا دعویٰ تے مسترد کریر، جنیوا کانفرنس اٹی جہانی ملک و شریدار آک پاکستان آ پت انا درشانی ءِ کریر۔ اوپارے کہ عمران خان آن چپ جہانی دنیا نوکاپ زہمی تتون سلوک ئسک، نوکاپ زہمی تا بحالی و پوسکن تفنگ کن جہانی ملک و ادارہ غاتا کنڈآن کمک آ تحریک انصاف نا ہرزہ سرائی است ہسونی نا سوبءِ ، عمران خان پدریسہ نوکاپ زہمی تے منفی کلہو تننگ ءِ، ہراتم نوکاپ ترندی آ ئسک ہمووخت آ ہم عمران خان جلسہ کریکہ۔ اوپارے کہ ننے نوکاپ زہمی تیکن جہانی دنیا غان کمک ہلنگ آ شرم ترفوک آتے ہمووخت آ انت اکن شرم بتو ہراتم اوفک کشکول ءِ دوٹی ہلسا چار سال  حکومت کریر و ملک ءِ وامدار کریر؟۔