ابوظہبی۔ 12 جنوری (اے پی پی) متحدہ عرب امارات قومی تیل کمپنی ابوظہبی نیشنل آئل کمپنی نا سی ای او سلطان احمد الجابر ءِ اقوام متحدہ نا کنڈآن اینخو مروک آ جہانی چاگڑدی کانفرنس ’’کوپ28‘‘ اٹی امارات نا نمائندہ نا وڑاٹ گدریفنگ نا پڑو کرینے۔ خبررساں ادارہ وام نا رداٹ سلطان احمد الجابر اماراتی سرکاری ادارہ سے نا اولیکو سی ای او ءِ، ہرا اقوام متحدہ ٹی تینا ملک انا نمائندگی ءِ کیک۔ سلطان احمد الجابر دا بابت اسہ گپ وتران اس کرسا پارے کہ نن اسہ عملی، حقیقت پسندانہ ایسری آ تالن نقطہ نظر اس اتینہ ہرا آب و ہوا و کم کاربن اقتصادی شونداری کن بدلی نا پیش رفت اس فراوان کیک، اومستی پارے کہ ای مخلصانہ وڑاٹ باور کیوہ کہ اینو کلائمیٹ ایکشن پائیدار شونداری ٹی زرکاری کن اسہ بھاز بھلو اقتصادی موقع اسے ۔ کوپ 27 نا دیوان تدوک آ سال نومبر اٹی مصر اٹی اڈ ہلکوسس، دا دیوان گرین ہاؤس گیس آتا اخراج ءِ کم کننگ کن پوسکن آ عزم انا تعین ءِ کننگ اٹ بے سہب مس۔ اینخو کوپ 28 نا دیوان نومبر و دسمبر اٹی دبئی ٹی مریک ہرانا مہمانداری ءِ متحدہ عرب امارات کننگ اٹی ءِ۔
