اسلام آباد۔ 12 جنوری (اے پی پی) صدر مملکت ڈاکٹر عارف علوی پارینے کہ ساڑی حکومت ملک ءِ زرگزرانی تنکی آن کشنگ نا کوشست کننگ اٹی ءِ، مشکل زرگزرانی حالیت آتیٹی اسٹیک ہولڈر آتا زمواری ءِ کہ پاکستان ءِ مشکل آن کشر، سیاست دانک اواری اٹ تولسا گپ وتران کیر تانکہ زرگزرانی پالیسی و گچین کاری تا حالیت پیدوار مننگ کے، زرگزران اٹی گچینی کن المی ءِ کہ پاکستان اٹی سیاسی درجہ حرارت کم مرے و سوگوی کن گڑاس باندات آتیا بایدے اتفاق مرے۔ داخیال آتا درشانی ءِ او برطانوی نشریاتی ادارہ بی بی سی ءِ خصوصی انٹرویو ٹی کرے۔ صدر مملکت پارے کہ سیاسی جماعت آتون اوار غٹ اسٹیک ہولڈر آک اختلاف آتے گوجالسا گپ وتران نا بناءِ کتور تو زرگزرانی حالیت آک پین خراب مننگ کیرہ، ملک انا سیاسی درجہ حرارت ءِ کم کننگ المی ءِ و دا کہ او دامسخت کن غٹ اسٹیک ہولڈر آتا نیام اٹ مذاکرات نا سلہ ءِ خلیرہ۔ صدر مملکت پارے کہ دا گچین کاری تا سال ءِ، گچین کاری بایدے مرے، دا (سیاسی جماعت )آک اسہ ایلو تون طے کیر کہ گچین کاریک زوت یا ہرے آ مریرہ، اگہ منہ تُو آن گچین کاری تا مونی پدی مننگ نا پرخ ءِ تو اودے ہم گپ وتران نا کمک اٹ طے کیر تانکہ زرگزران و مخلوق نا فلاح کن کاریم مننگ کے۔ اوپارے کہ دا ڈائیلاگ لس گچین کاری تیان مست مننگ المی ءِ۔ صدر ڈاکٹر عارف علوی حکومتی سیوت و پی ٹی آئی نا نیام اٹ مذاکرات نا سلہ ءِ خلسا پارے کہ کنا اوفتے دا سلہءِ کہ اوارتولر، کم از کم سیاسی جماعت آک ہی اسہ ایلو تون مذاکرات کیر، اوکان پد پارٹی تا بھلا بندغ آک ہم ملنگ کیرہ۔ صدر پارے کہ ننا ملک اٹی فیصلہ کروک آ مخلوق سوشل میڈیا ءِ سہی وڑاٹ ہینڈل کپننگ ءُ اودادے گچین وڑاٹ بایدے ہینڈل کیر۔
