ابوظہبی۔ 12 جنوری (اے پی پی) متحدہ عرب امارات نا صدر شیخ محمد زید النہیان پاکستان نا 2 ارب ڈالر نا ساڑی آ وام تا مد اٹی ودکی (رول اوور) و اسہ ارب ڈالر نا ودکی وام فراوان کننگ آ امنا کرینے۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہبازشریف پنچ شنبےنادے آ ابوظہبی نا دورہ نا اولیکو دے متحدہ عرب امارات نا صدر شیخ محمد زاید النہیان تون اوڑدہی کرے۔ یواے ای نا صدر وزیراعظم ءِ ابوظہبی ٹی بخیر کرسا پاکستان نا شونداری و شونہالی کن نیک است خواہی نا درشانی ءِ کرے۔ اوہڑتوم آ ملک آتا نیام اٹ تاریخی تعلقداری و متحدہ عرب امارات اٹی پاکستانی کمیونٹی نا خذمت آتا ستا ءِ کرے۔ وزیراعظم محمد شہباز شریف ایلم ملک انا دورہ نا سلہ غا متحدہ عرب امارات نا صدر نا منت واری ءِ ہرفے۔ داوخت آ ہڑتوم آ راہشونک پاکستان و متحدہ عرب امارات نا نیام اٹ ساڑی آ برادرانہ تعلقداری تیا گپ وتران کرسا واپار، زرکاری و توانائی نا بشخ آتیٹی تعلقداری تے پین سوگو کننگ نا است خواہی نا درشانی ءِ کریر۔ ہڑتوم آ راہشونک تین پہ تینی است خواہی نا علاقائی و جہانی امور آ ہم گپ وتران کریر۔ ہڑتوم آ راہشونک زرکاری ناکمکاری ءِ پین ودفنگ ، شریداری نا مون آ دننگ و ہڑتوم آ ملک آتا نیام اٹ زرکاری ءِ ودفنگ آ امنا کریر۔ اوفک ہڑتوم آ کنڈآتا تعلقداری تیٹی پدریسہ پیش رفت نا رفتار آ ہم است جمی نا درشانی ءِ کریر وخت اس کہ تعلقداری تے پین سوگو کننگ و ہرکہول آ ہڑتوم آ کنڈآتا ہن و بر و باضابطہ گپ وتران نا اہمیت آ امنا کریر۔ داوخت آ متحدہ عرب امارات نا صدر 2 ارب ڈالر نا ساڑی آ وام تا مد اٹی ودکی (رول اوور) و اسہ ارب ڈالر نا ودکی وام تا فراوانی آ ہم امنا کرے۔ وزیراعظم شہباز شریف یواے ای نا صدر ءِ دورہ ءِ پاکستان نا سلہ خلک ہراڑا او رضامندی نا درشانی ءِ کرے ہراڑکن تاریخ نا تعین ءِ سفارتی ذرائع نا کمک اٹ کننگک۔
