اسلام آباد۔ 12 جنوری (اے پی پی) وزیراعظم محمد شہباز شریف پارینے کہ ملک اٹی خولم نا بھلو کوڑی اس ساڑی ءِ، ملک اٹی اسٹ اسے ہم خولم نا تینا خون آن کاختی ودی کرسا نارو امنافع خوری نا موکل تفنہ، حکومت نیزگار الس کن نت انا تینا خودآن کاختی آن کبینی ودی کروک آتے سخت سزا ایتک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم تینا کماشی ٹی ملک اٹی خولم و نُت انا تینا خود آن کاختی و کوڑی کروک و ناروا منافع خوری نا بابت بڑزکو کہول انا ہلہلہ ئی دیوان اٹی گپ وتران کرسا کرے۔ دیوان اٹی بنجائی وزیر غذائی رکھ طارق بشیر چیمہ ، سلاہکار وزیر اعظم احد چیمہ، تعلقدار بنجائی بڑزکو کمامدار و صوبائی چیف سیکرٹریک بشخ ہلکر۔ دیوان اٹی وزیراعظم پارے کہ ملک اٹی خولم نا بھلو کوڑی اس ساڑیءِ۔ ملک اٹی کس اسے خولم نا تینا خودی آن کاختی ودی کرسا ناروا منافع خوری نا موکل تفنہ۔ وزیراعظم پارت کرے کہ صوبہ غاک تینا و پاسکو نا کوڑہ تیان خولم نا فلور مل آتسکان وخت آ رسینگ ءِ پک کیر، صوبہ غاک خولم نا وخت آ فراوانی کن تینا گورننس ءِ گچین کیر۔ تعلقدار بنجائی و صوبائی ادارہ غاک نت و خولم نا کوڑی کروک آتا برخلاف سخت گام گیج کیر۔ حکومت نیزگار الس کن نُت انا تینا خود آن کاختی آن کبینی ودی کروک آتے سخت سزا ایتک۔ وزیراعظم پارے کہ تدوک آ پنچ دے اٹی حکومت نا گام گیج آتا سوب آن نُت انا 40 کلو نا تھیلہ نا نہاد اٹی کم و ود 1000 روپئی نا کمتی واقعہ مس، ہراستاکڑزک۔ دیوان اٹی وزیراعظم ملک اٹی خولم نا ساڑی آ کوڈی تا جاچ ءِ ہلک۔ دیوان ءِ پاننگاکہ ملک اٹی خولم نا بھلو کوڑی اس ساڑی ءِ و صوبہ غاتے پارت کننگ انگ ءِ کہ پاسکو نا کوڑی تیان فلور مل اسکان خولم نا فروانی ءِ پین ترند کننگے، داکان بیدس 1.3ملین میٹرک ٹن خولم درآمدی خولم نا اسٹاک ہم ملک اٹی سرمسنے وخت اس کہ جنوری نا ایسر اسکان پین ہنداخہ اسٹاک سرمریک۔ دیوان ءِ پاننگاکہ اینخو سال سیزن نا ایسر آ خولم نا کیری فارورڈ اسٹاک 1.4ملین میٹرک ٹن مریک ہراکہ پوسکن آ سیزن نا بناکننگ آن مست ملکی غذائی گرج آتے پورو کننگ کن گنج اسے ءُ۔ وزیراعظم خولم نا ساڑی کوڑی تیا است جمی نا درشانی ءِ کرے و صوبہ غاتے پارت کرے کہ خولم نا فراوانی نا بابت تینا گورننس ءِ گچین کیر۔
