اسلام آباد۔ 12 جنوری (اے پی پی) وزیراعظم محمد شہباز شریف پارینے کہ پاکستان سعودی عرب نا وزیراعظم و ولی عہد شہزادہ محمد بن سلمان نا کنڈآن پاکستان نا نوکاپ آن زہمی تا بحالی کن اسہ ارب ڈالر نا امداد نا پڑو آ اوفتا منت واری ءِ ہرفک، پاکستان نوکاپ آن زہمی تا بحالی کن سعودی عرب نا امداد ءِ بھاز قدر انا نظر اٹ ہرک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم محمد شہباز شریف سعودی فنڈ انا چار باسکی ڈل اتون پنچ شنبےنادے آ اسلام آباد اٹی اوڑدہی ٹی کرے۔ ڈل انا کماشی ءِ سعودی فنڈ انا چیف ایگزیکٹیو آفیسر سلطان المرشد کریکہ۔ وزیراعظم پاکستان نا نوکاپ آن زہمی تا بحالی کن اسہ ارب ڈالر نا امداد نا پڑو آ سعودی عرب نا الس و حکومت نا است انا حب اٹ منت واری ءِ ہرفے۔ وزیراعظم مشکل نا داساہت اٹی پاکستان تون تفنگ آ سعودی وزیراعظم و ولی عہد شہزادہ محمد بن سلمان نا ہم خصوصی منت واری ءِ ہرفے۔ اوڑدہی ٹی پاکستان اٹی سعودی عرب نا چندی شونداری ڈٹ آتا ہم جاچ ءِ ہلنگا۔ اوڑدہی ٹی وزیرخزانہ محمد اسحاق ڈار، وزیرکانود اعظم نذیر تارڑ، وزیراعظم نا سلاہکار احمد چیمہ و تعلقدار بڑزکو کمامدارآک ہم ساڑی ئسر۔
