اسلام آباد۔ 11 جنوری (اے پی پی) وزیراعظم محمد شہباز شریف ریزیلیئنٹ پاکستان کانفرنس ءِ بھاز سرسہب گوندسا پارینے کہ نن اواری اٹ دنیا نا مون آ نوکاپ آن زہمی و پاکستان نا مقدمہ تون مون تسن، جہانی برادری ننے آ پبی پت انا درشانی ءِ کرے، قوم انا دعاک و اخلاص نا نتیجہ ٹی اللہ تعالیٰ ننے سرسہب کرے، داسہ ننے الس نا شونداری، شونہالی و نوکاپ آن زہمی تا بحالی و پوسکن تفنگ کن سیوت و یکجہتی اٹ کاریم کرسا الس نا مون آ سرسہب مروئی ءِ، سنگت ملک و جہانی برادری آن ملوک آ امداد نا اسہ اسہ پائی ءِ شفافیت اٹ خڑچ کننگک و تینا کشت وکشار، صنعت و انفراسٹرکچر ءِ بحال کینہ۔ داخیال آتا درشانی ءِ او چارشنبےنادے آ داڑے پریس کانفرنس آن تران کرسا کرے۔ داوخت آ بنجائی وزیر خزانہ اسحاق ڈار، وزیرخارجہ بلاول بھٹو زرداری، وزیر چاگڑدی بدلی شیری رحمان، وزیر مواصلات مولانا اسعد محمود ، وزیر قومی غذائی رکھ و پٹ وپول طارق بشیر چیمہ و اے این پی نا راہشون میاں افتخار حسین ئسک ہم ساڑی ئسر۔ وزیراعظم شہباز شریف پارے کہ جنیوا کانفرنس بھاز سرسہب پک مسنے ، دا کروڑ آ الس نا دعا و ہمو اخلاص و خواری تا بھرم ءِ ہرانا درشانی ءِ سیوتی حکومت نوکاپ زہمی تیکن کرینے۔ وزیراعظم پارے کہ غٹ زہمی تا بحالی و دُوارہ آباد کاری اسکان حکومت آسرات تولپک۔ اوپارے کہ جنیوا کانفرنس اٹی سنگت ملک و جہانی برادری جم وڑاٹ 9.7 ارب ڈالر نا قول کرینو، غٹ آن بھلا امداد نا پڑو اسلامک ڈویلپمنٹ بینک 4.2 ارب ڈالر کرینے، داکان بیدس ورلڈ بینک 2 ارب ڈالر، ایشین انفراسٹرکچر ڈویلپمنٹ بینک ہرانا ہیڈ آفس چین اٹی ءِ، اسہ ارب ڈالر، ایشیائی شونداری بینک 500 ملین ڈالر، آذربائیجان 2 ملین ڈالر، کینیڈا 18.6 ملین ڈالر، چین 100 ملین ڈالر، ڈنمارک 3.8 ملین ڈالر، یورپین یونین 87 ملین یوروز، فرانس 380 ملین یوروز، جرمنی 84 ملین یورو، اٹلی 23 ملین یوروز، جاپان 77 ملین ڈالرز، نیدر لینڈ مسہ نیم ملین یوروز، ناروے 6.5 ملین یوروز، قطر 25 ملین ڈالرز، سعودی عرب اسہ ارب ڈالر، سویڈن 7.5 ملین ڈالر، برطانیہ 36 ملین پاؤنڈز وامریکہ بذریعہ یو ایس ایڈ 100 ملین ڈالر نا پڑو کرینو۔ وزیراعظم پارے کہ جنیوا کانفرنس اٹی اقوام عالم پاکستان نا حکومت و الس آ پبی پت انا درشانی ءِ کرینے ، اگہ اوفتا خوانخواستہ گڑتی اس مسکہ کہ دا زر شفاف وڑاٹ خڑچ مفک تو داخہ بھلوامداد اسےنا پڑو متوکہ۔ وزیراعظم پارے کہ بدبختی اٹ ننا سیاسی مخالف آک بدترین پروپیگنڈا کریر ولے جہانی برادری اوڑا خف توتہو و تینا خراج پیئرز نا پیسہ غاتے پاکستان کن تس، دا پاکستان نا بھاز بھلو سرسہبی اسے، ہراڑ اپاکستان نا الس و سیوتی حکومت نا راہشون مبارکباد نا حقدار ءُ۔ وزیراعظم جنیوا کانفرنس نا سرسہبی کن پبی کڑد ادا کننگ آ وزیرخارجہ بلاول بھٹو زرداری ، وزیرخزانہ اسحاق ڈار ، وزیر چاگڑدی بدلی شیری رحمان، وزیر ڈٹ بندی و شونداری احسن اقبال ، اقتصادی امور نا وزیر ایاز صادق ، بنجائی وزیر حوالکاری و شینکاری مریم اورنگزیب ، وزیر مملکت خارجہ حنا ربانی کھر آن بیدس سیکرٹری خارجہ، پیشن نا ملک پاکستانی سفارت خانہ ومشن تا کمامدار و سیوتی حکومت نا راہشون تا منت واری ءِ ہرفے۔ اوپارے کہ ننے اسہ اسہ پائی ءِ تینا الس نا شونداری و شونہالی کن شفافیت اٹ کاریم اٹ اتوئی ءِ، اسہ اسہ پائی ءِ نوکاپ آن زہمی تا خذمت، اوفتا بحالی و پوسکن تفنگ کن خڑچ کننگک۔ وزیراعظم داہیت آ است ہسونی نا درشانی ءِ کرے کہ قوم اٹی تقسیم در تقسیم نا زیار اس تالان کننگانے و دا ننا سیاسی تاریخ آ بھاز بھلو دھبہ سے، اوکان پد ہم بنجا وغٹ صوبہ غاک اواری اٹ جنیوا کانفرنس اٹی دنیا ءِ سیوت و یکجہتی نا کلہو تسر و داکانفرنس اٹی غٹ صوبہ غاتا نمائندگی ساڑی ئسک، غٹ اواری اٹ پاکستان نا مقدمہ تون مون تسر و دنیا ہم ننا حکومت آ پبی پت انا درشانی ِ کرے ، داسہ داننے آٹے کہ ہراوڑ ارب آ ڈالر ءِ دے و نن خواری اٹ غٹ تر توانائی تے کاریم اٹ اتسا تینا نوکاپ آن زہمی الس و صنعت ، کشت وکشار، انفراسٹرکچر نا بحالی و شونداری و پوسکن تفنگ کن خڑچ کین اودے تینا سرسہبی نا بے مٹ وڑاٹ پیش کین۔ وزیراعظم سعودی عرب، قطر، یواے ای ، ترکی، چین ،ا مریکہ، فرانس، برطانیہ، کینیڈا ، یورپی یونین، اسلامک ڈویلپمنٹ بینک، ایشیائی شونداری بینک ، ایشین انفراسٹرکچر ڈویلپمنٹ بینک وورلڈ بینک اتون اوار غٹ سنگت ملک و جہانی ادارہ و جہانی برادری نا منت واری ءِ ہرفے ہرافک است انا حب اٹ پاکستان نا کمک ءِ کریر۔ اوپارے کہ اللہ تعالیٰ ننے آ بھاز فضل و کرم کرے و ننے کساس و اومیت آن بھاز زیات سرسہبی تس۔ وزیراعظم پارے کہ ہراوڑ نوکاپ آن پد پاکستان نا فوج، غٹ بنجائی و صوبائی ادارہ غاک اواری اٹ زہمی تا دمدستی کمک و بحالی کن کاریم کریر، ہمووڑ نن سیوت و یکجہتی اٹ کوشست آتے برجاتخنہ تو الس نا مون آ سرسہب مرینہ۔ وزیراعظم سعودی عرب نا وزیراعظم و ولی عہد شہزادہ محمد بن سلمان نا کنڈان سوگو ءُ کلہو اس تننگ و سیف ڈیپازٹ 5 ارب ڈالر اسکان دننگ و زرکاری ءِ 10 ارب ڈالر اسکان ودفنگ نا عندیہ تننگ آ ہم اونا منت واری ءِ ہرفے، وپارے کہ پاکستان نا سنت ملک آک ننکن اللہ تعالیٰ نا فضل و کرم اٹ بھاز بھلو وسیلہ اس جوڑ مسنو، داسہ ننا واری ءِ کہ کاریم کرسا نشان ایتن۔ اوداعزم انا درشانی ءِ کرے کہ سیوتی حکومت قوم ءِ مایوس کپک۔
