اسلام آباد۔ 11 جنوری (اے پی پی) وزیراعظم نا نمائندہ خصوصی بین المذاہب ہم آہنگی و دے ٹک نیامی امور حافظ محمد طاہر محمود اشرفی پارینے کہ جنیوا کانفرنس اٹی مچ آ دنیا پاکستان نا سرکڑدہ غاتیا پت انا درشانی ءِ کرینے، نوکاپ زہمی تیکن وزیراعظم شہباز شریف و سیوتی حکومت نا کوشست ستاکڑزک، مشکل نا دا ساہت اٹی سنگت ملک آک پاکستان ءِ تنیا ہلیتوس۔ چارشنبےنادے آ داڑے پریس کانفرنس کرسا پاکستان علماء کونسل نا چیئرمین حافظ محمد طاہر محمود اشرفی پارینے کہ قوم ءِ پاننگ نا گرجءِ کہ خلافت راشدہ نا نظام انت ئسک، ریاست مدینہ انت اس ئسک، الس ءِپاننگ نا گرج ءِ کہ خلیفتہ المسلمین رسول اللہ صلی اللہ علیہ و آلہ وسلم ہرانظام ءِ تسوسس اودے عملی وڑاٹ نافذ کرے ہراٹی اسہ ہم واکدار اس نزور نا زی آ ظلم کننگ کپک، مدینہ نا ریاست نا ہیت ءِ کننگ آسان ءِ، ریاست مدینہ ٹی احتساب مریک بیر ہلنگ مفک، انصاف درگہ غا مریک۔ اوپارے کہ پاکستان علماء کونسل و اوڑتون گنڈوک جماعت آک فیصلہ کرینو کہ جمعہ ناخطبہ غاتیٹی سید نا صدیق اکبر نا فضائل و خلافت راشدہ نا نظام و مدینہ نا ریاست امر مریک و انت اسے، ، بیان کننگک۔ اوپارے کہ پاکستان ءِ ساڑی حالیت آتیٹی وزیراعظم شہباز شریف نا خواری و کوشست آتیان بھاز بھلو سرسہبی اس ملانے، ساڑی سرکڑدہ غاتیا جہانی دنیا نا اسہ پت اس ہم ارے و اونا سرجم آتے وزیراعظم تینٹ بیان کیک، پاکستان علماء کونسل و ملک انا متصل جماعت آتا کنڈآن وزیراعظم و اونا ٹیم انا کوشست آتے تحسین پیش کیوہ، عرب اسلامی ملک آک خاص وڑاٹ سعودی عرب نا منت واری ءِ ہرفنہ ہراوڑ او ننتون تفے۔ حافظ محمد طاہر محمود اشرفی پارے کہ ہموفک ہرا سہب و شام پاکستان نا بابت پروپیگنڈا کریرہ کہ پاکستان زرگزرانی وڑاٹ ڈیفالٹ مننگ والا ءِ، اوفتے تون ہم عرض کننگ خواوہ کہ دا پاکستان ننا غٹ انا ءِ، پاکستان ءِ ہراہیت آن پاکستان نزور مرے، اوہیت ءِ ننے آن اسٹ اس ہم بایدے کپ، ننے پاکستان ءِ سوگو کروئی ءِ، تینا سیاسی یا ذاتی فائدہ غاتیکن اخہ بھلو پروپیگنڈا مہم اس لانچ کننگا کہ پاکستان ڈیفالٹ مننگ والا ءِ، دانا اثرآک ملک آ تمرہ، ہمووخت آ ہم نن پارین کہ ننا سنگت ملک آک انشاء اللہ پاکستان ءِ ڈیفالٹ نا کنڈا وخت اس ہم دننگ کن الیپسہ، چین، سعودی عرب، متحدہ عرب امارات و ایلو ملک آتا کنڈآن کمکاری ودنگ ءِ،گمان آن زیات سرسہبی ملانے، دا ذاتی وڑاٹ وزیراعظم غٹ جہانی راہشون و سرکڑدہ غاتون تینٹ رابطہ کرے، تحریک انصاف نا گڑاس سنگت داڑا تنقید کریر۔ اوپارے کہ عمران خان ہم پارے کہ جنیوا خواہنگ کن ہنار، عمران خان ہم تینا دور اٹی خواہنگ کن ہناکہ تننگ کن تو ہنتوکہ، اووخت آ ہم خواہنگ کن ہناکہ، گڑاس گڑاتیٹی نن تینا ملک و قوم انا سجفنگ و ہرن۔
