اسلام آباد۔ 11 جنوری (اے پی پی) ایشیائی شونداری بینک انا معاشیات نا چاہندار آک پارینو کہ براعظم نا پدتموک ملک آتیٹی کنوئی آ گڑاتا نہاد آتیٹی 10 درسد ودکی آن پین 64 لکھ شاری نیزگاری نا لکیر آن شیف ہِننگ کیرہ۔ داہیت ءِ اے ڈی بی نا کشت وکشار و غذائی سلامتی بارواٹی اسہ ساڑی ءُ رپورٹ اسے ٹی پاننگانے۔ رپورٹ نا رداٹ کشت وکشار ڈیہہ نا شونداری کن اہم ءِ ، ایشیا نا پدتموک ملک آتیٹی مسٹ آن اسہ مزور نا روزگار داسہ ہم کشت و کشار نا بشخ اتون وابستہ ءِ ولے دا بشخ کم پیدوار و کٹیا ناسوب آن مشکل آتا گواچی ءِ۔ اسہ کساس اسے نا رداٹ ایشیائی ڈیہہ ٹی نیزگاری نا لکیر آن شیف زند ءِ تیرکروک آ پنچ آن چار بندغ خلقی آ علاقہ غاتیٹی رہینگرہ، داحالیت آتا رداٹ کشاری پیدوار اٹی ودکی نیزگاری ٹی کمتی و ڈیہہ نا اقتصادی بدلی ءِ مون آ دننگ کن اہمیت تخک۔ رپورٹ اٹی پاننگانے کہ پدتموک ایشاٹی کشت وکشار ءِ طلب، غیر موثر ویلیو چینز، موسمیاتی بدلی، و دیر انا کاختی نا چیلنج مون تروک ءِ، ڈیہہ ٹی ودوک آ شونہالی آن پد ہم غذائی کاختی نا ویل ساڑی ءِ۔ بینک انا پاننگ ءِ کہ تدوک آ اِرا دہائی ٹی ایشیا نا پدتموک ملک آتیٹی بین نا برخلاف جنگ اٹ نمان پیش رفت مس ہراڑان 200 ملین آن زیات مخلوق ءِ غذائی کاختی آن نجات ملا، دا پیش رفت متاثر کن ءِ ولے ڈیہہ ٹی 300 ملین آن زیات مخلوق داسہ ہم غذائی بے رکھی نا گواچی ءُ۔ ایشیائی شونداری بینک خور انا رکھ و پائیدار شونداری کن اسہ جوان و کثیر الجہتی حکمت عملی آ عمل کننگ ءِ، ادارہ خور انا پیدوار، پروسیسنگ، مارکیٹنگ و فراوانی نا نیٹ ورک آتے مربوط کننگ اٹ کمک کننگ ءِ تانکہ خور و کشاری ویلیو چین تا لچک و کارکڑد ءِ سوگو کننگ مرے۔ رپورٹ اٹی پاننگانے کہ آخبت اٹ ممکنہ غذائی تنکی تون مون تننگ کن ایشیائی شونداری بینک تینا شریدار آتون اواری اٹ گونڈ، نیامی و مریس معیاد ڈٹ آتیا عمل کننگ ءِ۔
